Reímonos del home del paleolíticu cuando creemos que pintaba nes paredes de les cueves p'atraer la caza; mexámonos de risa cuando vemos a un chamán danciando pa traer l'agua n'época de sequía. ¿Pero creen que tamos tan lloñe de la superstición y de la creencia na maxa del home primitivu o del selvaxe actual? ¿Acasu nun hai millones de persones que miren l'horóscopu o echen les cartes o llamen a l'adivina a la tele tolos díes?
¿Y esi actu de fe primitiva de Diego Costa diendo a Belgrado pa que-y pongan placenta de yegua na pata, pensando que topara un remediu milagrosa nuna curiosa serbia? ¿Y los doctores y directivos del Atlético de Madrid dexándolu dir? ¿Y Simeone poniendo en peligru la final al alliniar de mano un futbolista que tol mundu sabía que diba cascar lluegu, porque la maxa y los milagros nun esisten?
"En toles cases cuecen fabes -diz el refrán-, y en mio casa a calderaes". Pero l'únicu que creía que tenien poderes milagrosos -aparte'l protagonista del cuentu de les fabes máxiques- yera Pitágores; pero non porque lo creyera -como desvela Luciano de Samosata-, sinón porque sabía que mandando coses escures y misterioses, la xente diba tenelu por sabiu y facer casu de los sos conseyos; esto ye, porque sabía de sobre cómo somos, y que yá nun creemos nes bruxes, pero creemos nel horóscou, nel tarot, nes cenices del puru, nel alicorniu, nes echadores de cartes, nos aldovinonos de la tele y na placenta de yegua.
No hay comentarios:
Publicar un comentario