Un llibru de cuentos: Azurriángamelamelonga (Segunda edición)

AZURRIÁNGAMELAMELONGA (SEGUNDA EDICIÓN) Azurriángamelamelonga ye un conxuntu d’once relatos variaos, más cuatro “Ensiertos” y una “Alvertencia editorial”, asoleyáu por Trabe en 2011. Dalgunos (como «Meruxis aprucientibus», «A la redondiella», «En ningún tiempu», «Dende un puntu de vista bien llevantáu») tienen como base narraciones orales populares o histories reales que l’autor conociera nes sos andances peles tierres asturianes. Per otru llau, les materies van del mundu actual y les trames y envidies universitaries («El sabor de les palabres / Divines palabres»), al de la prehistoria y les cueves («Mamuth»), el de la fantasía («Ella yera como un ánxel») o’l de la vida interna de los partíos políticos («Por méritos propios»). L’erotismu ta presente na mayoría los cuentos, especialmente n’«El llibru les refutaciones», «El sabor de les palabres/ Divines palabres», «Amanita phalloides» y en tres de les histories populares enriba citaes. El llibru piésllase con unos «Ensiertos a la segunda edición», onde se dan otres posibles variaciones narratives de dalgunos cuentos y ponse en dulda’l narrador de parte de lo narrao. L’humor y les cites de triba variada (científiques, lliteraries, históriques…) anden -o esñalen- per uquiera, como en tola mio narrativa, la mayoría les vegaes nada más que suxeríes. En fin, que vos invito a lleelu y va prestavos.