El Piles

Un soneto me manda hacer Violante…

Y efectivamente, inxamás me viera en talu aprietu. Porque ¿qué ye lo que significa aconceyanos equí pa celebrar el vixésimu quintu aniversariu d’un centru públicu? O, dicho d’otru mou, ¿qué ye lo que nos mueve a caún de nós a tar equí hoy?

Evidentemente, nun esiste una rede social emotiva en tornu al institutuu, como sí ocurre, por exemplu, en dalgunos otros institutos, o sobre too en dellos colexos privaos: nin hai una asociación d’antiguos alumnos, nin esisten actos anuales que congreguen a los ex escolinos pa vese. Frente a los centros privaos, como queda yá suxerido, los centros públicos nun estimulen, además, una idea de pertenencia colectiva a un club o a un llugar; pero, además, y hasta onde yo sé —y polo que me diz Gerardo Manrique, a quien tanto-y debe esti alcuentru y a quien tanto hai qu’agradecer pol so trabayu y entusiasmu— nun ye inconmensurable, tampoco, el sentimientu d’arreyamientu al IES El Piles ente los antiguos discentes.

Pa más INRI, la voluntá asociativa del pueblu asturianu y español nun ye grande que digamos, como probablemente tampoco lo ye ente nosotros la idea del reconocimientu qu’a la sociedá —esto ye, a caún de los nuestros vecinos— debemos polos beneficios que recibimos a través los impuestos que l’Estáu recauda. Y, per otru llau, si nos atenemos a les biografíes individuales, tampoco son les edaes nes que se pasa pela ESO y el Bachiller les edaes nes qu’afinquen en nosotros les amistaes definitives, les maníes, les xenerosidaes o los entusiasmos de pa tola vida: polo que nun ye fácil que’l pasu pel institutu tenga dexao una güelga imborrable na nuestra memoria o na nuestra personalidá. Nin siquier ye fácil, más bien ye una probabilidá estadísticamente irrelevante —vamos apuntalo pal desconsuelu la nuestra vanidá—, que la figura d’un enseñante o la so pasión orienten definitivamente una vocación o una profesión. ¿Qué ye, entós, lo que nos afala a tar equí? ¿Qué ye lo que nos xunta y, tresallá d’ello, lo que nos xune? ¿Lo que fai que güei se cierre temporalmente un círculu que, simbólicamente, abre don Jesús Fernández Estrada como director y pieslla él mesmu como inspector?

«Un soneto me manda hacer Violante, que en mi vida me he visto en tal aprieto», ya digo, pero vamos intentalo. En primer llugar, ¿cuála ye la interacción que se produz ente les persones qu’estudien nun centru y el profesoráu qu’imparte les materies nes que s’instruyen? Escasa, pero cierta. Probablemente una parábola puede danos cuenta d’esa sutil e imperceptible interacción. Imaxinemos la corriente un ríu. Nel so centru hai una roca, dura sólida, pero, con tou, sensible a l’acción del agua. Al chocar contra ella, cada una de les molécules que formen parte de la corriente ve condicionada temporalmente y modificada la so trayectoria. Dempués, seguirá agües abaxo’l so rumbu, ensin memoria acasu d’aquel pilancu temporal; pero, en tou casu, la so «veloz corrida hacia la mar» —que diría Manrique, non ésti, el profe, aquél, el de Paredes de Nava— yá quedó condicionada pol choque cola roca allugada metanos la corriente. Si, pa encima, suponemos que la roca desprende dalguna partícula del so propiu material, que va mezclase coles hasta entós «corrientes agües, pures cristalines» garcilasianes, tendremos que convenir que, anque quiciabis incognoscible a primera vista, seguramente irreconocible ensin una consciencia profunda, la güelga de la roca inconmovible va dexando los sos escatafinos neses partícules de la gran corriente, en caúna d’elles. Pero nun ye solo’l ríu’l que se fai roca, ye tamién el peñéu’l que se modifica. La fuerza la corriente, n’efeutu, va dexando nél les sos marques, va camudando la so estructura, modelándola, por sólida que paeza, conformándola progresivamente distinta col pasar de caúna de les gotes d’agua, de les individualidaes pasaxeres, fugaces, coles que s’atopa.

Eso ye asina, oxetivamente: la mutua interacción de los seres humanos xuntos a lo llargo d’hores y díes fae que les güelgues d’unos dexen una traza nos otros.

«Por el primer terceto voy entrando, / y aun parece que entré con pie derecho». Pero tolo que llevamos dicho nun xustifica la “puñe…flera” pregunta, «¿qué co…, qué coimes facemos equí». Porque si la parábola del ríu y la roca metanos d’él puede ser desplicativa, fain falta otres condiciones p’aconceyanos nesta efeméride. Recordémoslo: nun tenemos socialmente una gran tradición asociativa, tampoco ye sobresaliente la emoción de pertenencia a un centru públicu, nun son les edaes nes que se pasa pel institutu les más afayaíces pa la duración, si trabamos amistaes «no nos acompañarán hasta la tumba»; si amores, «no nos acompañarán hasta la noche», que diría Martín Santos.

La primera d’eses condiciones, entós, pa que güei temos equí (o pa qu’otros que nun pueden tar equí tuviesen el propósitu de venir, o pa que vayan sumase más tarde) ye la consciencia de cómo se produz el procesu oxetivu d’esa interacción ente docentes y discentes que yá desplicamos. La segunda, la más importante, ye la voluntá; voluntá, per un llau, de facer oxetivu esi procesu, de constituilu como un ente social, reconocible, polo tanto, ente’l conxuntu de los individuos que componen la sociedá más o menos prósima —la xixonesa, l’asturiana—, y facer d’él un vector más de la interacción social. La voluntá tamién, per otru llau, prospectiva o proactiva de facer que lo que nun ye sea; que lo que deba ser llegue a ser, esto ye, de qu’esi escasu apreciu pol agradecimientu, pola memoria, pol asociacionismu, polo colectivo, que decíamos enantes que nos caractericen, nun sean elementos incamudables d’una naturaleza social eterna, sinón etapes transitories que debemos abandonar pa dir a una situación meyor. Nuna palabra, la voluntá de construir un mundu a la medida de los sueños y los enfotos de meyora, anque esi nuevu mundu nun vaiga ser más que —tal vez somos conscientes, señardosamente conscientes— un mundu efímeru, un mundu que, puestu en pie, si conseguimos ponelu en pie, acabará esbarrumbando o perdíu otra vez ente la niebla de la borrosa memoria de les xeneraciones venideres.

De forma modesta: lo que nos trae equí ye un puntu de voluntá de memoria; un migayu d’empeñu en facer una sociedá un poco meyor, porque creemos que la futura ha de ser meyor que la que tenemos: sentidu y sensibilidá, pues, son los que nos traen equí; sensibilidá y proxuiciu, proactividá, si-yos suena más la palabra: ¿Correspuéndenos por ello una distinción piquiñina, un méritu anque minúsculu sea?, ¿una plizquina de satisfacción como ciudadanos y miembros d’esta sociedá que ye, en pequeñu, l’institutu al través de la so hestoria? Son vustedes los que, cola mano nel corazón y l’índice nel llugar del xuiciu, deben respondese.

En tou casu, y no que respecta al relator, al encargáu del encargu, «contad si son catorce y ya está hecho».


[semeyes del blog del XXV aniversariu d'El Piles]