O quiciabis nun fala d'eso, sinón de los fatos que los criaren y que los tán criando. ¿De qué falo? Escuchailo:
Xueves día 8, Colunga día de mercáu. Al pie la Ilesia tán un grupu de persones que vende y rifen coses pa les misiones de Benín y que se ponen ehí pa toles feches. Acercámonos pa compra-yos un daqué como siempre facemos la mio muyer y yo. Vende plantes, lloteria Ñavidá, mermelaes caseres, canela en palu de verdá...
De repente pasa al pie nuestru una tropiella rapacetos d'ente diecisiete y quince años y una d'elles diz al altu la lleva (naturalmente, en ...) "¡Qué asco!", y da un sáltatepatrás xunto con otres dos mozaques que griten lo mesmo a continuación, pero más baxo. Yo de mano pensé que dalgún de los rapazos soltara un fumiacu, pero nun ficieren ningún comentariu d'eso y miraben pa les escaleres de la ilesia, onde yo nun veía nada pa gritar asina.
Pero, ¡ai amigu!, al poco pasen dos rapacetes de menor edá, como de dolce años y griten lo mesmo, "¡qué asco!" (tamién en c...) y dan otru saltu apartándose pa un llau. Y agora sí, agora vilo claro: lo que-yos provocaba un ascu tan grande y -yos afalaba unes esclamaciones d'esa mena yera ¡un pitu vivu!, un gallu magníficu que taba vivu nuna xaula.
Eso ye refalfiu y fatura. Eso ye parte'l futuru. Pero son, sobre too, los fatos que los eduquen.
No hay comentarios:
Publicar un comentario