Gracies a l'autor d'ella, José Ángel Gayol, y al periódicu pola mesma.

En busca d'Asturies

Una semeyanza de Xuan Xosé Sánchez Vicente

01.10.2020 | 00:29

Xuan Xosé Sánchez Vicente. MIKI LÓPEZ

Agora que Xuan Xosé Sánchez Vicente recibió'l Premiu Nacional de Lliteratura Asturiana convendría facer semeyanza de la so obra lliteraria (al marxe queda la estaya política de la so personalidá, munches vegaes xunida de manera inevitable a la xera lliteraria). Sicasí, nun va ser posible llegar a pintoriu nesti envís, tan escomanada s'albidra la obra de XXSV. Fadríen falta varies tesis doctorales pa recuperar masque sía percima les claves ideolóxiques, llingüístiques, etnográfiques, psicolóxiques y lliteraries de la so abondosa obra ensayística. A lo anterior podemos sumar la poesía, los rellatos, les noveles, los artículos, les traducciones, les imprescindibles ediciones de clásicos? ¿Quién ye entós XXSV? La suma de too ello, la integración na mesma persona de lo que significa Asturies pal pasáu y pal futuru.

Alvierto na obra de XXSV un mecigayu de tradición y modernidá nun clasicismu culturalista difícil d'atopar n'otros autores asturianos. Gusta XXSV de metros clásicos propios d'autores del sieglu XVII y siguientes, tanto nos temes como nes formes, clásicos castellanos o asturianos. Si siguiéramos la sienda de la so poesía atoparíemos nel camín poemes de corte social, otros amorosos, munchos elexiacos, dalgún toque épicu y munchos tropos barrocos y cultistes. Orografía y toponimia dicen más que'l nome de llugares. Sitios y pueblos componen una poesía de voz propia que s'escribe na tierra y esnala pal cielu namás col enfotu de garrar perspectiva de páxaru y adicar pal país asturianu, esto ye, pa volver a la tierra. En XXSV Asturies resume toles miraes y el llector escueye a qué Asturies canta'l bardu de Xixón, si a l'Asturies nación, a l'Asturies española o (la mio preferida) seique l'Asturies como país nel sentíu francés, cultu, responsable, comprometíu, intelixente y solidariu. Asturies como país ricu, de talante viviciegu y señardosu al empar, d'orbayu eternu. Pumarín, Xixón, Les Arriondes, Nava?

Pa XXSV, Asturies ye nación y asina reellabora'l mitu de Cuadonga. España nun nació nos Picos, sinón namás Asturies, como reinu y entidá propia. "Inxamás esta nación / Ablucó énte pueblu estrañu: / Nun pudieron visigodos / Ponenos xugu al costazu, / Nin entregamos tampoco / Tributos a rei estrañu; / Y al mesmu César Augustu, / El emperador romanu, / Costó-y sangre y costó-y años / Pisar el suelu asturianu". O esos versos que dicen: "Y mientres l'home igua los uxeros, / afata pa les goxes les banielles, / maya la sidre, aperia los carreros, / per tres de los bastiazos y los xelos / suaña la primavera que, ente verdes, / traerá nueves naciones y retueyos", escribe'l poeta en machadianos versos. Píramu y Tisbe, Hero y Lleandru, romances, alderiques poéticos, en XXSV alenden Marirreguera y Bernaldo de Quirós, Acebal y Pría; tamién hai dalgo de la poesía d'ocasión y folixa que tanto cautivaron los nuestros en sieglos anteriores.

Llector atentu y maestru de la pallabra asturiana, XXSV amaciña cincuenta años d'una obra y una sabencia que nun conoz llendes. Sí conoz milenta pallabres (non en devanéu publicó dellos diccionarios) y conoz la tradición como país al que volver. Présta-y el xuegu metalliterariu y culturalista igual na poesía que na prosa. La de so ye una narrativa oral, col arume d'un Sancho Panza sabiu que gana nos diálogos y n'actualización de la tradición. Testos áxiles y al serviciu de la hestoria, que nun descuiden el procuru formal precisu. Y al final de la sienda: Asturies. Siempre Asturies. Como un raposu que sigue los nicios d'un enguadu indefiníu. Mesmo en Lluna llena o en Azurriángamelamelonga, por poner dos exemplos narrativos, XXSV caltién, al marxe de les estremaes propuestes estilístiques, un filu soterrañu d'identificación o construcción del carácter asturianu. Asturies ye una presencia constante, de forma tácita o espresa. Nos ensayos la narratividá sirve al razonamientu cuciu, la intelixencia prudente y el xuiciu convencíu sobre los males de la patria. Nos poemes xurde la llírica señardosa del home qu'espera. Nos cuentos apaecen les almes nobles y los xestos honestos del asturianu o asturiana comunes. Nes noveles l'escenariu sirve pa dalgo más que como espaciu o sustentu pa los personaxes. XXSV respira Asturies, y cáen-y de los bolsos trocinos d'Asturies colos que riega la so lliteratura infinita. Norabona.