Ciudadanos fartucos y ciudadanos ejemplares

(Ayer, en La Nueva España) L’APRECEDERU CIUDADANOS FARTUCOS Y CIUDADANOS EXEMPLARES En Mieres vienen hai tiempu produciéndose manifestaciones contra una situación de delincuencia reiterada que, además, ocasiónase pola actuación d’unos determinaos individuos que, deteníos y llevaos a xuiciu, queden llibres de forma inmediata. Los vecinos “piden midides a los xueces” y quéxense “de la falta de mano dura”. Y nun crean que nun ye gorda la cosa porque hasta la Delegada del Gobierno se tien manifestao “pidiendo a los xueces contundencia pa colos delincuentes multirreincidentes”, y reclamando al Poder Xudicial, “correxir esi pilancu frente a la eficiencia policial”. Ye verdá qu’hai xueces y xueces, pero tamién que munches de les lleis paecen tar feches al mou y manera d’aquella definición que pal preservativu daba la Sévigné “armadura pal placer, telaraña pa la enfermedá”, armadura pal delincuente, telaraña pal ciudadanu honráu. Revisen per uquiera. Do-yos solo una información: Clan de les Top Models. Diez años “trabayando”, más de 700 robos con fuerza en pisos al mes. Deteníes y a la calle. Asina que, amás de fabricar lleis nueves, convendría que Gobiernu y Parlamentu revisasen les lleis-preservativu. Por suerte tamién disfrutamos de buenes nueves. Dalgunes son puros aprucimientos de coses que pasen toles díes, por exemplu, la información que LA NUEVA ESPAÑA da d’una familia xixonesa formada por José Manuel Solares, Ángeles Morales y la so fía María, que los fines de selmana dedíquense a recoyer basoria na rodiada de San Martín del Mar. Son unos más ente otres munches persones anónimes que cuiden del mediuambiente. Gracies a toos. Pero lo más prestoso de la selmana fueron les disculpes públiques que dos divulgadores presentaren a López-Otín por tener desacreditao’l so trabayu científicu solo “dexándose guiar pol ruxerrux”. Aquella fola d’acusaciones falses fizo munchu dañu a la investigación y, sobre too, a la propia persona de López-Otín. Yo alégrome d’estes disculpes, como d’otres anteriores, pol caderalgu de Bioloxía Molecular, anque hai daños que, de xuru, nunca van poder reparase.