Una visita a El llegáu español nos EEUU

EL LLEGÁU ESPAÑOL NOS EEUU Ayer tuviemos viendo nel edificiu l’antigua Rula, en Xixón, la esposición El legado español en los Estados Unidos de América. La idea central de la esposición ye la de mostrar esi llegáu, qu’entama pola ayuda que prestó España —económica, loxística, militar—, nel reináu de Carlos III pa la independencia de los EEUU; ensin ella, reconocen dalgunos estadounidenses, nun hubiera habido independencia. De fechu, los estadounidenses débennos un montón de perres, en documentu reconocíu, primero por eses ayudes pa la independencia, dempués pola “compra” de Florida, que tampoco pagaren. Pero la esposición, y les esplicaciones de los dos tenientes que tán al frente la esposición, tien otra guía fundamental: esaniciar la Lleenda Prieta sobre España, especialmente, lo referido al racismu y la esclavitú, Por eso se señalen les Lleis d’Indies, la condición de “súbditos” del Rei de los aboríxenes, les amestances de races o la presencia al frente de les tropes españoles como dalgún prietu, talu el Capitán Mandinga, de nome Francisco Menéndez, con esi apellíu tan asturianu. Y esi tratu hacia los indíxenes sorráyase especialmente frente a lo que de verdá facín los ingleses o los ingleses independizaos, los del “we the people”. Dende’l puntu vista asturianu, dalgunes curiosidaes, el primer español nacíu naquelles tierres fue un descendiente d’un de Tinéu, y el primer día d’Acción de Gracies celebráronlu asturianos, precisamente l’ocho de septiembre, y, non con pavu, con garbanzos. Acudimos, en visita alcordada’l día anterior, el mio hermanu Rubén, la mio cuñada Luci y el mio cuñáu Ángel Luis. Acompañárennos na visita y ficieren de guíes los tenientes Evaristo Martínez-Radío Garrido y Jorge Fernández Castro, agabitaos pol teniente Torres. Les sos desplicaciones fueron abondoses, precises, entreteníes y diches con entusiasmu (que yá saben que’l so significáu ye’l de “tar poseídu pol dios, digamos, por un xanu”). Además, tola charla fue fecha n’asturianu cultu, polo que nos prestó más, supongo que tamién a les persones que se diben sumando al grupu a intervalos. Instruíos y agradecíos. (Por ciertu, tán a tiempu de pasar perillí hasta’l día 31 d’esti mes. Antaínen).