De Lluís Xabel Álvarez, sobre De los sueños hicimos pesadilla

Güei, en La Nueva España (https://www.lne.es/cultura/2025/03/06/guerra-novela-114975234.html), esti xenerosu y cariñosu comentariu de Lluís Xabel Álvarez sobre De los sueños hicimos pesadilla: Guerra, y más que novela Un llibru históricu-existencial que ye la meyor narración sobre la contienda civil n’Asturies. Xuan Xosé Sánchez Vicente, autor básicu de la lliteratura asturiana, publicó’l llibru "De los sueños hicimos pesadilla" (Impronta, 2024). Una extraordinaria novela, pero como ye más qu’eso convién presentar delles comparaciones. El llargu, críticu y expresivu títulu pón-nos na idea de que dalgo dramático vamos lleer y asina ye porque trátase de guerra. De los antecedentes y de la guerra civil mesma, la d’Asturies y con más cercanía al autor, la de Xixón. La nuestra lliteratura tien referencies importantes sobre esi tema. "Nosotros, los Rivero", de Dolores Medio, centrada n’Uviéu. "Asturias: catorce meses de guerra civil", autobiográfica de Juan Antonio Cabezas. Más reciente, "El día de la ira", de Lluís Portal, que como Sánchez Vicente destaca la figura de Melquíades Álvarez. Y de mou especial el raru "L’home de choque" (1936) del francés Joseph Peyré, que cuenta la revolución del 34 con un estilu mui asemeyáu al de Xuan Xosé. Agora bien, la calidá y significancia d’eses obres nun quita que la obra que comentamos axunte los valires d’elles n’un planu superior y non por ser la última sinon por ser la más completa, orixinal y estructurada nel rellatu de la tráxica guerra que cumplirá, na próxima xeneración, los cien años. Tenemos el llibru, en castellán colos topónimos n’asturianu. 304 páxines que contienen una serie d’escenes, díes o xornaes que van del "Domingo, 18 de agosto de 1929. 15.25 h" al "Viernes, 17 de agosto de 1945. 18.00 h. Xixón" (sic). Los fechos son reales, les persones nun son de ficción sino auténtiques, existentes . Xente y circunstancies que’l autor guarda nel recuerdu o nel recuentu históricu. Les xornaes formen un gran collage que salta de sitiu en sitiu pero n’estricta cronoloxía. Les escenes son d’Asturies pero salten al panorama español de xemes en cuando. Dende’l puntu de vista xixonés hai que notar qu’hai cincu escenes siguíes a distintes hores n’un día mui señaláu pola violencia extrema: "Viernes, 14 d’agosto de 1936, Víspera de Nuestra Señora de la Asunción". Ehí se tastiará l’estilu realista ensin bromes de X. X. Sánchez Vicente. Con mui bones elipsis, con un vocabulariu xustu d’época y de clase social. De toes formes el movimientu de persones y fechos ye talu que convién char una güeyada a una de les novedaes d’esta obra, la "Nómina de personajes, partidos políticos, instituciones y navíos" (pp. 305-338). Un par d’exemplos. "Cotón" ye l’alcuñu d’un militante cenetista que sal muncho nos suaños y nes pesadielles. La Nómina repasa y resume les xornaes d’él: "Cotón", Eugenio, Cortina y otros asedian y asaltan el Simancas (03/08/1936). Todos ellos se hallan en la batalla del Cuera, en el Turbina, donde "Cotón" se sacrifica para que los demás puedan escapar". La escena "Miércoles, 22 de septiembre de 1937, 12.22 h." dizlo n’estética. A "Cotón" quéden-y dos cartuchos de dinamita: "…se irguió y gritó mientras los lanzaba: ¡Adelante, adelante! ¡Unos besos de bienvenida de la República y la libertad!" L’otru exemplu apaez nel penúltimu día d’esta obra, "Sábado, 2 de junio de 1945, 16.00 h. León/Asturies". Benigno Fernández, a piques de pasar "los sesenta y tres túneles de Payares" torna a casa, dende Francia. ¿Y quién ye Benigno? Activu miembru del Partido Republicano Federal tuvo cargos y salvó vides con heroica autoridá durante la guerra. La familia espéralu na estación. Angelita, la muyer, les dos fíes, Lolina y Kukita, y los suegros, xente conocío de Xixón. ¿Y qué diz al final de la so escena? "Mirar hacia adelante, sin que tiren de vosotros los hilos ensangrentados del pasado" (páxina 301).