Iniciatives culturales notables

L’APRECEDERU

(semeya de La Nueva España) INICIATIVES CULTURALES NOTABLES En 2019 arrancó Asturias Capital Mundial de la Poesía, sofitándose na llamada de Naciones Xuníes pa celebrar el 21 de marzu como Día Mundial de la Poesía. La iniciativa afalóla perespecialmente l’ayeranu Graciano García García, al qu’Asturies-y debe’l desendolcu d’otros entamos bultables, como’l de la Fundación Príncipe d’Asturies y los sos Premios. Dende esa fecha, la iniciativa poética vien sumando apoyos continuos y relevantes, y faciendo cada añu actuaciones imaxinatives y atractives. Esti añu, pa celebrar el Día Mundial de la Poesía, que va tener actos en munches llocalidaes asturianes, hai una novedá llamativa, los pilotos d’Iberia van recitar, al aterrizar na nuestra patria, dalgunos versos. Además, camúdase l’eslogan, que va rezar asina: “Asturias ama la poesía”. Llamatiblemente, una moscona, Victoria Juvín, sopelexa la iniciativa en Brunswick. Pero, probablemente, la noticia cultural más destacable ye la de que la Universidá Llaboral (reparen la yunción intencionada de les dos palabres) entama camín pa convertise en Patrimoniu Mundial. Al marxe de la so utilidá social nel pasáu como centru de formación pa fíos de trabayadores, la Llaboral ye un monumentu escepcional. Agora bien, dende la izquierda, especialmente a partir de la Transición, túveselu como un llugar “nefandu” pol so aniciu franquista, tanto que durante un tiempu, tresferíu’l centru, el Gobiernu Areces negó que fuese nuestru. Y ye solo dende va poco, gracies principalmente, a l’Asociación d’Antiguos Alumnos, que, además, vien denunciando males actuaciones, desapaiciones d’elementos culturales, retrasos nes igües del monumentu, que va valorándose l’edificiu como lo que ye, una maravía. Pienso yo que si esta prexuiciosa tropiella manzorguera tuviere un poco más lleída, envede despreciar l’edificiu y infrautilizalu, perdiendo tiempu y dineru, podíen tenelu fechu al mou y manera de Quevedo cuando, pa “purificar” un edificiu ocupáu por Góngora, quemó nél garcilasos. Pues estos bien podíen tener quemao nel patiu de la Llaboral unos marx y unos engels. Perres aforraos, babayaes non diches, y toos contentos.