Cimo yéramos (narraciones)

COMO YÉRAMOS (narraciones) Como yéramos (Trabe Ediciones, 2023) ye’l cuartu conxuntu de narraciones curties qu’asoleyé. Como yéramos, asina, ensin tilde nin interrogaciones. El títulu fae referencia al mundu que se narra, porque, efectivamente, les narraciones d’esti llibru correspuenden, na casi totalidá, a fechos, ambientes y personaxes d’una época que diría dende principios del XX a finales la década de los sesenta. Personaxes, fechos, ambientes y histories son toos reales, acasu con dalguna modificación nos nomes propios o en delles circunstancies del so vivir; y, naturalmente, col artificiu lliterariu necesariu pa facer d’ellos ficción lliteraria. Hai dos excepciones. Una ye Exul et umbra / un exiliado, una sombra, que s’asoleyó en La Nueva España’l 11/12/2014, y que, ente narración y reportaxe, tien les mesmes calterístiques de les otres narraciones. La otra, Manolín, el ñerbatu y el fortnite, de desemeyanza visible dende’l títulu. Escribióse nel 2020 pa les clases de cuartu del Colexu Públicu El Llano, de Xixón, onde estudiaba’l terceru los mios nietos, David Aldayturriaga Sánchez, especialmente pa la clase d’asturianu. Previstu pa la llectura personal por mi nel centru, l’acorripiamientu de los primeros momentos la pandemia impidiólo. Ensin embargu la llectura pudo facese nel 2021, y los escolinos trabayaren sobre’l cuentu, aparte de face-y mil preguntes al redactor. Los tres primeros, Agustín entró, Castañón y Ciudadela, tienen como protagonistes a personaxes -un xubiláu xardineru, un trabajador de Moreda, un pinche- que viven en tres distintes ciudadeles de Xixón. En Mercedes, la muyer d’un republicanu que tien qu’esiliase y los años que pasen hasta qu’él vuelve, col recuerdu de la torna de La Santina peles cais de Xixón (los personaxes d’esta narración son parte importante de la mio reciente novela, De los sueños hicimos pesadilla, de tan bona acoyida, y que va pela segunda edición). El protagonista de Meruca ye un marxinal que se dedica a xeres varies y a dalgún robucu. Toc, toc cuenta la historia d’un xubiláu ferroviariu que perdió la pata nun accidente, y la de la so vilba. Tres camisines y tres mudes ye la dispidida d’una madre al so fíu de doce años mentantu s’alloña’l barcu que lu lleva a América. L’espeyu ye la rememoración restrospectiva d’una familia qu’un de los fíos fae cuando s’esvacia’l pisu que compartieren pás y hermanos. La verdá, que tuvo abonda suerte ye un títulu irónicu que narra la historia de la familia y d’una de les fíes d’un carreteru de mala vida. Rosina Montes, la d’una muyer que se les arregla col so esfuerzu y la so dignidá dempués de que la engaña y la dexa’l paisanu. Fermina reviste a Osiris ye l’esfuerzu d’una muyer casada con un maizón tacañu por dase un gustu y meyorar la casa. Hermanos ye una pieza dramatizada onde los protagonistes son dos hermanos, militantes en bandos contrarios y enfrentaos a muerte durante la República y la Guerra, y con muerte, ente ellos. De les dos narraciones finales, Exul et umbra / un exiliado, una sombra y Manolín, el ñerbatu y el fortnite damos cuenta al entamu. En tol llibru, amás de la bona escritura -les dos güeles de mio yá morrieren desayaque-, hai rellumos continuos d’humor y d’ironía, asina como de referencies culturales. Y, como se diz nel primer párrafu, too, too lo que se cuenta, de la xeografía a los personaxes, de les histories a les anécdotes, ye historia real y concreta. Esto ye, «talo como yéramos». Eso sí, camudada en lliteratura non solo pola escritura, sinón pola arquitectura del rellatu, de la búsqueda de la sorpresa, de la invención de personaxes secundarios, del cierre “en picu” de la narración pa sorprender al llector y facelu gociar del cuentu.