Un poema recién acabáu

NIETOS Coles primeres hores la mañana son les risines, y el lloru y los bracinos espurríos buscando acoyimientu y cuellu. Les hores posteriores ven los primeros galanes y les primeres lletres, y el cabás y el mandilón pa la escuela. La escuela, de glayaríu en patiu, de pintura en mandilón a cuadros y nes manes. Y esi correr al salir d’eses clases primeres, colos brazos abiertos, buscando otros brazos, un gasayu y un besu. Y, más tarde, mociquín, velu dende la verxa correr ente los otros tres la pelota o a xuegos que nós, allá habrá tanto, xuguetiamos. Y, yá mui llueu, les primeres opiniones, les primeres idees, el primer discurrir per unes sendes propies. Remocicamos al so contactu, al so pasu, cola so vista, al facese ellos y dir dexándonos atrás a nós, camín alantre. Y a cada intre, nós, que yá nun yéramos los mesmos, volvemos otra vegada, acasu, a ser los mesmos, un instante Como Anteo, al cincar esos suelos.