Acabo de lleer el caberu y póstumu llibru de la notable periodista y muyer de lletres Oriana Fallaci, la novela, Un sombrero lleno de cerezas (Un capello pieno di ciliege), un llibru estensu (669 páxines, lletra curioso), con portada dura y de preciu mui aceptable (27,92 €).La novela ye una especie de crónica familiar novelizada, pela que, a lo llargo dos sieglos (dende'l primer terciu del XVIII a la metada del XIX) van reconstruyéndose les vides de los antepasaos de la Fallaci, en dambos caños del árbol xenealóxicu.
Les llinies que definen la cadarma narrativa son les siguientes:
a) Ñidiamente, les propies vides de los personaxes;
b) La consciencia que de caún tien la narradora, Oriana Fallaci, que se ve espeyada nellos y, a la vegada, al facelo, toma consciencia de sí mesma;
c) Les condiciones materiales y sociales de la vida de los personaxes y del so tiempu;
d) Los paisaxes nos que se desendolquen les sos vides;
e) Un leit-motiv políticu: el de la unificación y construcción d'Italia;
f) Les reflexiones xenerales de la narradora acerca de la vida, la llibertá, la opresión , les utopíes y les sos consecuencies inevitablemente sangrientes, la relixón y el so papel esplotador y enquillotrador.
Munchos pasaxes de la novela tienen un magníficu tonu épicu, tanto pol esbrexamientu de los personaxes na gueta de los sos oxetivos personales como nel delidiamientu por oxetivos políticos colectivos. Xunto con esi tonu épicu, ún de los elementos más interesantes de la novela, ta la magnífica traza de la mayoría los personaxes (excelentes, per exemplu, María Isabel Felipa, Luca, Caterina, ente otros munchos) y la complicación y variedá de les sos peripecies (les d'Anastasia, por decir, les de Francesco Launaro).En consecuencia, recomiendo Un sombrero lleno de cerezas, una llectura prestosa siempre, apasionante munches vegaes, amena y qu'afala a la reflexión, al mesmu tiempu que nos fae proyectar la nuestra empatía sobre'l procesu de construcción nacional italianu.
Y, cómo non, fainos almirar una vegada más a Oriana Fallaci y agradece-y la so escritura.
