Efectos de la primavera

Nun ye mala idea esta de repasar los efectos químicos de la primavera sobre los seres vivos: la sangre alteria (y la salvia o cazume tamién) nel ABC.

La primavera la sangre alteria

Mirái qué par de sanxuanines.

¿La primavera la sangre altera? via @abc_es

Primaveres/Prímules

Primula vulgaris (P. aucalis, (L.) Hill) Ye una especie perenne, con una roseta lasa de fueyes oblanceolaes a obovaes, agurriaes, irregularmente dentes. Flores perfumaes, mariellu pálidu col centru más escuru, que desurden individualmente en rabinos áfilos de llargos pelos, que salen de la roseta foliar. Corola 2-4 cm de diámetru, con pétalos esmellaos estendíos; cáliz tubular, angular, de llóbulos puntiagudos llanceolaos. Florez mui llueu en primavera, una de las primeres flores que lo fae n'Europa,d'ehí'l nome inglés ("Primrose" que vien del francés antigu primerose y, a la vegada, del llatín medieval prima rosa, "primera rosa").

Prímules

En Duz, el 10/03/13.

Primula vulgaris (P. aucalis, (L.) Hill) Ye una especie perenne, con una roseta lasa de fueyes oblanceolaes a obovaes, agurriaes, irregularmente dentes. Flores perfumaes, mariellu pálidu col centru más escuru, que desurden individualmente en rabinos áfilos de llargos pelos, que salen de la roseta foliar. Corola 2-4 cm de diámetru, con pétalos esmellaos estendíos; cáliz tubular, angular, de llóbulos puntiagudos llanceolaos. Florez mui llueu en primavera, una de las primeres flores que lo fae n'Europa,d'ehí'l nome inglés ("Primrose" que vien del francés antigu primerose y, a la vegada, del llatín medieval prima rosa, "primera rosa").

Retrasu de la primavera

Siéntese perayures dicir que la primavera vien esti añu retrasada. ¿Ye así? Pues puedo da-yos un datu: les semeyes qu'equí llanto son del 26/03/11 (sábadu), y recoyíen les primeres fueyes qu'entamaben salir nos pumares de La Miñota, Morís, lo que quier decir que, nesa fecha, teníen yá dalguna dómina más dende que desurdieren.

Esti añu non solo nun hai fueyines, sinón que los gromos (esa especie de plumina blanca peronde empiecen abrise los puyos) malapenes tán espoxigaos.

De toes formes, y como siempre, aportará la primavera.

Primavera en Morís: la raxao (A Cristina Alonso)

A Cristina Alonso, rival en pumaraes y en política.

Asoleyo esta selmana nueves semeyes de la pumarada.

La semeya del mediu ye un pumar de raxao. La d'enriba, de xuanina, que sigue almiratible y esllumante una selmana más.

Reventó por fin la raxao, ye la filera de la manzorga na semeya d'embaxu. A la derecha, na mesma semeya, ta la solarina, yá avanzada na fueya.

Les semeyes tomárense'l 08-05-1010.

Primavera en Morís

Imáxenes tomaes el 01/05/10.

Como se ve, dende la selmana anterior la floración espolletó. La xuanina -abaxu, derecha- ye un españíu de color blancu, comparatible a cualquier Jerte, la solarina -enriba- sigue'l so cursu, colos botones roses que la singularicen.

La floración, pues, bayurosa. El problema agora ye que'l tiempu, fríu y, en dacuandu, lluviosu, nun ayuda pa que los insectos salgan del ñeru y polinicen.

Per otru llau, ye de temer que daqué xarazada que cayó (en concretu y, de xuru, el domingu 2) y daqué bastiazu tiren parte la flor. Pero, como digo, lo más importante ye que nun hai calor nin sol suficiente pa la polinización, y el tiempu espérase fríu unos díes más.

Dotramiente, alviértase'l suelu, fombráu de margarites una vegada más, pese a les siegues, que lleva tando yá asina, lleráu de margarites, dende l'entamu d'abril.

Primavera avanza

Señalaba l'otru día cómo avanzaba la primavera y apuntaba los brotos de fueyes y les primeres fueyes, nos árboles, especialmente la solarina.

Esta selmana yá se multiplicara'l númeru de fueyes y avanzó la floración, especialmente na solarina, la más temprana, pero tamién na xuanina y na raxao (estes, solo en dellos árboles).

Pongo equí dos semeyes de la solarina. Una, un conxuntu, pa que se pueda ver l'espoxigue les fueyes (puede comparase col ensiertu del 19/04/10 d'esti blog); l'otra les flores d'un árbol, onde se puede ver dalguna flor yá abierta y los brotos roses apunxando.

Les semeyes tán tomaes na mañana del sábadu 24 d'abril.

Primavera en Morís, siguen los brotos

Asoleyo equí los brotos de los pumares de "solarina" el día 18 d'abril. Frente a la selmana anterior, onde nun había más qu'un puñáu de brotos, agora los árboles tienen yá una trompaína curiosa, anque non plena.

Les otres variedaes de mazana tienen yá los guaños apusllando por brotar.

Por ciertu, yeren "brotos verdes", como decía'l simpáticu ensiertador de la selmana pasada, pero non brotos verdes zapateriles nin salgadeños.

Primavera en Morís (Güerres, Colunga). Margarites

Ehí van delles semeyes del esplendor de dalgunes margarites de colores estremaos.

Que les disfruten.

Primavera en Morís (Güerres, Colunga)

Los brotos de los pumares más tempranos yá tan abriendo, y los demás van moviéndose. Doi equí una semeya de brotos de solarina.

Per otru llau, los árboles más mozos paecen abrir enantes. Asina ocurre con esti serpollu de raxao, yá con flor, y colos puyos d'una durona (quiciabis confundía ella o confundía la clasificación de la triba del árbol.

Per otru llau, tamién tán abriendo los puyos de les perales (como esta, de conferencia), y les pescales yá tienen tamién flor.

Les semeyes tomárense na tarde del 09/04/10.

Primavera en prau Picón

(La semeya ta tomada'l 11/03/10, hacia les siete menos diez de la tarde).

Anque la primavera resístese a aprucir y espolletar, en plenu Uviéu, en Prau Picón, a la parte trasera d'unes cases del barriu, ente ropa tendío y la herba entovía seco del inviernu en prau, oriella del Seminariu, estes ñisales dan noticia del tiempu que vien.

Al mesmu tiempu, les mimosales, qu'esti añu tomárense tamién el so tiempu pa floriar, caltienen entá parte del so esplendor.

¡Vendrá la primavera, nun s'esmuelan!