Compartí con Fernando Morán López (Avilés, 1926, Madrid, 2020) delles hores de conversación, de bona relación (nun sería yo a dicir que d'amistá) y de política; primero nel PSP(A), dempués nel PSOE.
Diplomáticu, ministru d'Esteriores, senador per Asturies tres la retirada de Wenceslao López (acompañélu en dellos momentos de la so campaña n'Asturies cuando se convocó l'escañu vacante), miembru del Consejo Regional de Asturias, acasu los fechos más conocíos de la so trayectoria sean la so oposición a la OTAN y sobre too, la negociación pa la entrada d'España na UE (que, por ciertu, festexaron él y el so equipu cantando l'Asturies, patria querida).
Home cultu, intelixente, que sabía escuchar y con un gran sentíu del humor (que, por ciertu, compartía cola so muyer, Mari Luz Calvo Sotelo, tía carnal de la que fue ministra, Mercedes Cabrera), al marxe de la política, Fernando Morán fue pensador y ensayista notable (Nación y alienación en la literatura negro-africana -la wikipedia pon "alineación", ¡qué-y vamos facer!-; La destrucción del lenguaje y otros ensayos) y novelista. D'ente la so obra lliteraria, recomiendo También se muere el mar, qu'asocede nel Avilés anterior a la industrialización. De xuru que-yos presta lleela.
¡Que la so memoria se caltenga!
No hay comentarios:
Publicar un comentario