Crónica de la lluz y la solombra

Crónica de la lluz y la solombra Anda taliando per dellos llugares d'España Antón García pa presentar la so novela Crónica de la luz y la sombra, torna de la so Crónica de la lluz y la solombra, Premiu Xosefa Xovellanos 2014. Supongo que la torna al castellanu prestará a los sos llectores porque ye una gran novela: la variedá de puntos de vista narrativos (incluyía una torna d'un testu d'Adeflor); la construcción de los personaxes (la fatura del xuez y del fiscal, la cuciedá d'un abogáu, la tochura d'otru, la personalidá complexa del reu, Gancedo, el comportamientu la so familia -la difunta la so muyer, Manulina, de so madre, la Lleona, del so hermanu- y, sobre too, de la so amante; la peculiar personalidá del executor del condenáu al garrote); la perspectiva y los intereses de los periodistes que siguen el procesu y l'axusticiamientu; l'ambiente de miseria y falta de perspectives del pueblu de los protagonistes, etc. Too ello, repito, fae de Crónica de la luz y la sombra una gran novela, pero... Pero Crónica de la lluz y la solombra ye otra cosa tamién: la so dicción, el ritmu la so prosa, la precisión de descripciones y oxetos, la riqueza la so fraseoloxía y el so léxicu. Too ello constitui una maravía de la que nun van poder disfrutar los que llean la novela en castellanu. Disfrutarán, pero eso, esa esquisitez, esa prestosidá van perdelos. Comoquier que sea, ésitu.