José Cristóbal García Pérez asoleya na Nueva España un magníficu diagnósticu (non novedosu, nós llevamos diciéndolo desayaqué) sobre los asturianos.
Vien resumise la so argumentación en dos puntos: nel primeru, apunta que los asturianos tamos siempre dispuestos a preocupanos polo de los demás o esmolecenos colo que fain los demás, pero escaecemos el mirar polo nuestro y pa la nuestra casa. Nel segundu afirma que, agora, dellos asturianos empiecen a mirar con munchu interés pa UPyD, que nun vien ser otra cosa que PP y PSOE, pero con faldes, esto ye, que s`esmolecen munchu pol castellanu y les coses del estáu n`otres comunidaes, pero que, como a PP y a PSOE, impórta-yos un pitu lo nuestro y desprécienlo, como nonada o caxigalina.
Invítolos a lleer con detención la carta, una magnífica epístola que se titula "Patria neurótica", na siguiente dirección:
Por cierto, nesta vocación enfermiza de salvapatries universales, podemos recordar cómo pasamos equí quince díes de destrucción y muerte, solinos, nel 34, pa "salvar el mundu"; cómo al entamu la II República los nuestros diputaos y prohomes decidieren que lo nuestro nun tenía importancia, que lo de los demás tenía que dir delantre, y asina quedamos ensin estatutu; de qué mou y manera, al entamar la Guerra Civil, los mineros corrieren vía alantre hacia Madrid, tamién pa salvar el mundu, mentantu equí Aranda aprovechávase d`esa ceguera salvatriz; y cuála fue la forma na que mandemos tropes pa salvar Euskadi, tamién pa "salvar el mundu, la República y la revolución", dexando`l cuidáu de lo nuestro.
Non d`otra manera a como agora apoyamos los estatutos de Cataluña, Andalucía, Valencia, Baleares o Aragón, pa que tengan más perres y competencies a costa nuestra; a como "nos sacrificamos" con un AVE de segunda pa qu`otros tengan meyores ferrocarriles; a como apoyamos la permanencia nel ámbitu públicu de los astilleros de Galicia y Andalucía, mentantu entregamos los nuestros al sector priváu y los desmantelamos; a como votamos escontra la variante`l Payares nel so día; a como vamos sofitar el nuevu modelu de financiación, que va senos perxudicial etc.
"L`universalismu -podíemos decir-, la enfermedá autodestructiva del asturianu". O, nos términos más clásicos del refraneru: "Asturianu: llocu, vanu y mal asturianu, que cuerre salvar al mundu y dexa la casa y los fíos pa que-y los cuide l`aire".
