Esti miércoles, 20 de mayu, tuvo nel IES El Piles un equipu de la TPA. L'equipu, una productora independiente, venía acompañando al profesor y artista Federico Mieres, al que ta siguiendo durante un tiempu llargu pa un programa onde s'acompaña a persones destacaes durante 24 hores (esi ye, más o menos, el sentíu y títulu del espaciu).
Al marxen d'otres tomes nel institutu, l'equipu la TPA acompañonos durante'l café al grupu de persones que formamos la tertulia habitual con Federico a la hora'l recréu. La so presencia sirviónos pa plantear dalgunes cuestiones d'actualidá relatives a la enseñanza. En concretu aldericamos sobre un tema d'actualidá, el de la vuelta del conceptu de la "madurez" como parámetru de calificación del Bachilleratu. Vo esponer lo qu'ellí dixe.
La frase de Machado "Todo necio / confunde valor y precio." podía ser el resumen de la mio argumentación. Desplico: la idea de qu`un alumnu suspensu pueda ser "reevaluáu", nel casu de que sólo-y queden suspenses dalgunes poques asignatures, col parámetru de les sos capacidaes globales y non de los resultaos concretos en dalguna materia pretende, nel fondu, presionar p`aumentar el númeru d'aprobaos.
La cuestión ta en relación col conceptu mesmu de fracasu escolar. Mientres que pa una persona normal -y pa la mayorìa los enseñantes- una persona con fracasu escolar ye una persona que termina los estudios con déficit de conocimientos sobre la media, pa los sucesivos gobiernos (especialmente pa los autodenomaos "progresistes") el fracasu escolar nun ye más qu'un guarismu: la cifra de suspensos, independientemente de que sean merecidos (bien xulgaos, bien calificaos) o non. Dende esi presupuestu contable, reducir el númeru de suspensos supón reducir el fracasu escolar. Esa ye la razón de que los gobiernos (especialmente los autodenomaos "progresistes") presionen pa qu'aumente el númeru d`aprobaos (ensin importar la correspondencia qu'ello tenga colos saberes reales de los escolinos). Esi ye'l motivu de que n'Andalucía, por exemplu, arreyen les subides salariales de los profesores al númeru d`aprobaos; ye esa tamién la causa de que'l Gobiernu asturianu tenga intentao (en relación cola carrera profesional, y, polo tanto, n`últimu términu, coles perres de los salarios) que'l númeru d'aprobaos subiere un 1% anual.
Ehí ye, precisamente, onde hai qu'enxertar la "resurección" del conceptu de "madurez" como una revaluación de los previamente suspensos.
Lo que, otra vegada, sería una ilustración de los versos de Machado: "Todo necio / confunde valor y precio".
