Gallinetes n'El Piles

Gallinetes (Gallinula Choloropus). Esti añu volvieren criar na mesma zona d'El Piles que l'añu pasáu, anque non satamente nel mesmu llugar (nel mesmu matu). Esta vegada fue ente les xunglares de la semeya (del 16/06/12, por ciertu).

Supongo que la pareya ye la mesma. Tamién, como l'añu pasáu, sacaren dos críes, de nun sé cuántos güevos (l'añu pasáu tuvieren nueve).

Esta vegada pilléles yá un poco crecides. La segunda, por ciertu, un poco más tímida, escondióse darréu de la que me sintiera.

Nel 2011 conseguí ver los pollos de gallineta'l día 23 de xunu (el día 7 yá llocalizara los güevos), al mio talantar de tamañu menor qu'estes del 2012.

Bona noticia n'El Piles

REPITO EQUÍ UNA ENTRADA DE XUNU DEL 2011

Dende'l 7 de xunu tenía contralada una parexa de gallinetes (Gallinula Choloropus) que teníen puesta una ñerada en El Piles (Xixón). Yeren nueve güevos (ver imáxenes), que guaraben a medies machu y fema. El día 20 taben entovía guarando, pero'l 21 yá nun quedaben nin los pás, nin había paxarayos nin güevos. Llevé un sustu tremendu, porque, al nun haber escatafín de cáscara nin castra de pollu (ver semeyes), pensé daquién robara los güevos o que los llevaren o destrozaren les gaviluetes. Pa colmu nun veía pel ríu más qu'un de los dos miembros de la pareya. Asina siguió'l miércoles 15.

Güei, xueves, 23 engayoléme tou, porque, dempués de nun volver dala de los dos gallinetes pela mañana, a eso de les 12 apaecieren el machu y la fema con dos fíos (ver semeyes). Nun sé si habrá más. D'habelos, sacaré-yos una semeya y asoleyarela pa que la vean.