Comunícame un amable seguidor d'estos ensiertos (Xabel) que'l nuevu llogotipu de Xixón incumple los alcuerdos firmaos ente'l PSOE y IU (y sopelexaos por IU) pa da-y tratu igualitariu al asturianu y al castellanu nesti tipu de coses.
Per partes, en primer llugar, hai que señalar qu'esti llogotipu gana con munchu al anterior (aquel de la "G" enxareyada con una "A"), que naide sabía lo que yera nin significaba, colo cualo, evidentemente, la so capacidá propagandística (p'atraer turismu, ente otres coses) yera cero. Esti (un "gijón" que tien debaxu un "Asturias con sal") nun ye que sea una xenialidá nin una ayalga estética, pero, polo menos, ye claru y tien un daqué de gracia.
Pero pensar que los presuntos compromisos ente'l PSOE y IU sobre l'asturianu van cumplise nun se-y pudo ocurrir más qu'al que ye un pinín, o ta cegaratu -de suyu o pola fe-, o tien intereses en IU. Porque nin el PSOE quier saber nada col asturianu nin ye pa IU una cuestión de munchu interés, más allá de les campañes electorales, nes que sabe que, con un pocu d'afumamientu d`asturianu y unos ensalmos, atonta les abeyes y failes posar en cestu.
Porque pa esto del asturianu la política de IU acuéyese al refrán: "Prometer hasta meter, y dempués de metíu, nada de lo prometíu". O, como decía'l vieyu chiste de Quevedo (que ye tamién un cuentu asturianu, ensin Quevedo, claru) cuando'l rei y diz a la princesa que'l sacu de monedes d'oru que-yos prometieren nun yera oru, sinón "chapines", lo que-y arrespuede la princesa dende dientru'l cuartu nel que'l pagador yá ta puestu al asuntu:
-Si son chapines, como si son chapones, yá me la tien metía hasta los...
Pues eso, dempués que se votó, hasta'l prósimu engañu, digo, dicen, la prósima campaña electoral, que siempre va haber abeyes dimpuestes a posar al llamáu de l'abeyera y les voces del amu.
Ayer, el Biesca Xixón Hockey Club proclamose de Campeón d'Europa de clubs femeninos de hockey sobre patinos (¡¡por tercera vez!!).
