Cambiu climáticu (1586)

Nel 1586, el veintiún de septiembre, día de san Matéu, el mes decidió poner en práctica la segunda parte del so dilema ("o seca les fontes o arrasia les pontes") y arrasió coles pontes de media Asturies. Ente otres víctimes y accidentaos, en Llangréu, una muyer que llevaba al so fíu en cuellu, hubo subise a un ablanu y ellí tuviera dos díes ensin comer nin beber. Durante esos dos perllagos díes, nun sabiendo si les agües subiríen más o abocanaría; aterecía de fríu, arranada de sede, esfamiada de fame; tarreciendo caese y vese arrastrada; esmolecía y col corazón fendíu pol rapacín, ¿qué diría pa sigu? ¿qué xuxuriaría al rapacín? ¿qué pediría y prometería a los Cielos, o cuala sería, a vegaes, la so quexa pa con ellos? “Nun t’esmolezas, fiyín, que van venir por nós?", "Ea, ea neñín, durme, durme, que t'amparen los ánxelinos", "¿Nun abocanará esti bastiazu, que tamos ya caltriaos hasta los güesos?" ''Si son los mios pecaos nun será abondu, ¿pero qué culpa tien esti infeliz, Santina de Covadonga?" "A ver si dura esta llugada y calecemos un pocu”.