Una comisión d'investigación

Una comisión parlamentaria. Agora que va entamar una sobre lo de Zarréu, nun taría mal recordar esta otra, que ye parte de la narración "El sabor de les palabres / Divines palabres", que forma parte del mio llibru de narraciones Azurriángamelamelonga (Trabe, 2011). Al marxen de la seriedá del tema, daqué paecíu habrá nes formes. —¿Reír? A gargayaes. Si hai nomes que paecen trazar el destín. Por cierto ¿van volver llamate al Parlamentu a declarar na Comisión? La Nueva España L’atalaya de Gregorio «Un descansu necesariu» La Comisión parlamentaria entamada con motivu de les denuncies contra el profesor director del Departamentu de Llingua de la Universidá Lliteraria d’Uviéu lleva más de tres meses de funcionamientu, ensin que se sepia mui bien entovía cuálu ye’l so oxetivu real nestos momentos. Anunciada dempués de les denuncies de dellos colectivos y coincidiendo cola apertura d’un procesu xudicial escontra’l caderalgu, la Comisión constituyóse ensin un oxetivu claru. Aparentemente la so finalidá yera la enunciada finalmente (recuérdese que, de mano, presentóse col pretestu d’un xenéricu y eufemísticu «política d’investigación universitaria») al constituise la mesma: estudiar el usu sexista del llinguaxe nel conxuntu de la educación asturiana, pero realmente’l so oxetivu yera, como nun se-y escapaba a nadie, el d’entamar un xuiciu paralelu que diere satisfacción a dellos colectivos feministes de la rodiada de PSOE e IU, los cualos veíen nel «casu» la ocasión pa una llarga campaña d’axitación y –nel so talantar– con- cienciación. El rápidu albortar del procesu xudicial (al menos per parte’l fiscal, yá qu’esisten entovía pendientes de resolución recursos entamaos poles acusaciones particulares), la petición anticipada de xubilación por parte’l profesor y la so demanda de permisu hasta que se solucionare esta, dexaren a la Comisión, namás arrancar, ensin oxetivu real. El ridículu parlamentariu que supondría’l pesllala ensin entamala na práctica obligó a los grupos parlamentarios a disviar l’oxetivu real y centrase nel que yera inicialmente un pretestu: «Llinguaxe sexista y enseñanza n’Asturies». Pero, per otru llau, la investigación sobre les presuntes actividaes d’acosu sexual yera demasiao golosa pa pesllar esa puerte definitivamente y entamó a convocase a parte de los llamaos a declarar nel espediente xudicial. Sumáronse a eso intereses intra e interdepartamentales, que fueren filtrando a los partíos políticos documentos o actuaciones que per- mitíen axustes de cuentes ente profesores y facciones universitaries. El PP aprovechó, al mesmu tiempu, anque un poco más sutilmente que davezu, pa sacar la so enemiga escontra l’asturianu y la normalización social de la llingua. Intervinieren entós, posicionándose a favor y pidiendo ser llamaos a declarar, asociaciones defensores del asturianu, como la Xunta Pola Defensa la Llingua, y, rápidamente, apaecieren tamién les fuerces hostiles al bable y del procesu de normalización, como los llamaos Amigos de los Bables. En fin, pa resume del llector avisáu: l’habitual guirigái asturianu del toos escontra toos, sólo que, esta vegada, con más participantes na rodiella. Too ello nun tuviera más importancia si fuera posible caltener los oxetivos iniciales (espovisaos, vamos recordalo, pola realidá y les decisiones de los tribunales) o si los partíos supieren lo que facer dempués. Pero arrastraos d’un llau polos grupos sociales a los que sirven de portavoces (o, en palabres de dalgún amigu de llevantos, «de cuyos votos son esclavos»), teniéndose convertío la Comisión nun marabayu de caminos investigadores, y, sobre too, nun siendo, en principiu, el blancu la mesma l’acción de Gobiernu y, nun habiendo, polo tanto, dende’l partíu mayoritariu, intereses qu’amparar o xestiones que defender, al Executivu vien-y bien esa rodiella, que distrái al públicu de les posibles carencies de la so xestión. Asina les coses, comprenderán los llectores que dieldaren les peores zunes parlamentaries: la búsqueda del titular y la foto como elementu fundamental de l’acción política, la oposición al contrariu sólo por selo, el pruyimientu de mostrase siempre roceanu o desconfiáu delantre los testimonios de los testigos, la conversión de granos d’arena en montañes, etc. Llegaos a esti puntu y cercanu yá’l descansu veraniegu, les persones de xacíu común y bona voluntá –ente les cuales, evidentemente, esti articulista nun se cuenta–, que sienten un balagar de vergoña pol desarrollu los acontecimientos y que, por creer fondamente na democracia y nos partíos políticos, nun deseen que siga esti descréditu, anden naguarientos de que les vacaciones sirvan pa reflesionar y pa que la Xunta pueda salir ensin munchu compromisu del enguedeyu nel que ta metida y del que nun ye pa desempatonase. Les persones de xacíu común y bona voluntá, pues, esperen a la vuelta del veranu que la Comisión pueda enterrase rápida y discretamente. Pol bien de toos. De mano, del de los propios partíos parlamentarios. [………………………………………………………………………….] Discutíi, discutíi. Lo que nun voi contavos ye que yo acubixo dalgunos papeles de don Amando. Unes reflesiones sobre’l léxicu sexual y la creatividá individual; delles consideraciones acerca de les supervivencies –el so arume o aldu más bien– de la hestoria colectiva e individual nel léxicu del sexu. Nun vos lo voi decir, ñidiamente, como nun lo dixe a la Comisión. ¡Y si supieren, además, que nun paeciera nes indagaciones comisioneriles –polo menos hasta agora– el datu de que tamién atropaba, como parte d’un proyectu novedosu, cuentos tradicionales de frasca erótica, talo eses versiones de La raniella, que son magnifiques, o de La ñeña que se fexo oveya y que vo publicar en cuantes esto abocane. ¡Si, hom, pero voi sopelexalo yo agora! Porque, bueno, equí entovía: Álvaro y Cristina y Vanessa..., y los demás, tomen les coses como les tomen, y son capaces de bromear y d’aceptar matices, pero ellí, nel Parlamentu, ¡qué seriedá pollinesca! ¡Qué manera d’enchipase pa entrugar babayaes: «¿Y está usted seguro de que todos los escritos del señor Naves son suyos, quiero decir, que no habrá existido una cierta apropiación indebida de lo que podríamos llamar propiedad intelectual del alumnado?». O pa poner el focicu espurríu de la que se fai una pregunta trivial, yá respondida milenta vegaes y ensin dala importancia: «¿Sabían ustedes, cuando entregaban sus trabajos, que se podría dar otra utilidad, como así fue el caso, a sus fichas de campo y a los datos personales en ellas contenidas? De haberlo sabido o previsto, ¿las hubiesen entregado? ¿Habría tenido usted, al menos, escrúpulos?». O d’empiquerase y enfachendase pa conminar a ún a que dixera que sí al formula-y aquel: «¿No le parece a usted inaceptable el uso sexista del lenguaje y más su manipulación con intenciones de abuso sexual?» ¡Qué seriedá, que dan tantes ganes de reíse! Y los del PP aprovechando: «¿No cree usted que muchos de estos problemas provienen de la voluntad de inventar e imponer una lengua que no existe –nosotros, por supuesto, estamos a favor del asturiano real, del bable que habla cada uno en su valle o en su casa, de los bables vamos, pero no de esa jerga inventada–; en palabras claras, en esa vocación de manipulación (compartida, por cierto, por algún grupo de esta Cámara) para hacernos tragar una lengua que nadie quiere, a través de la cooficialidad?». Y les feministes asistiendo ansioses a toles sesiones, a ver si podíen colgar o capar a dalgún varón, y manifestando’l so desagradu, más o menos ruidosu, más o menos xuxuriáu, cuando dalgún s’atrevía a nun condenar a don Amando o a defendelu. O yá non a salir por él, a defender a cencielles la llicitú del trabayu del Departamentu. Qu’a ver si agora, por exemplu, el castellán puede tener el so Diccionariu secretu y nós non. O a ver si ye que la moxigatería y lo políticamente correcho espoxiguen y van enlle- nándolo too, ocupando tolos requexos del mundu, como en La esfera y la cruz. Y nun vi siquier a un diputáu o diputada que-yos diere un migayín la risa, que se-yos notare un poco que yeren conscientes de la comedia que taben representando y de qu’aquello too nun tenía más xacíu que l’ocupar páxines de los periódicos y da-yos satisfacción a dalgunes corripies de votantes. ¡Qué seriedá pollinesca! ¡Pero de toos, ¡eh!, de toos ensin escepción! Lo que más […………………………………………………………………. ] Nun creas que nun talanto lo que tarás pensando, Manolo, viendo a los mios collacios entrugar tan encerriscaos toa esta serie de caxigalines y babayaes, que nun tienen otra xixa yá, de la que se peslló la vía xudicial, que dar parecencia de xustificable a lo ensin xacíu. Y yá sé que pienses que soi una mazcayona, qu’esperabes de mi, de xuru, otra actitú, polo menos un pelín de comprensión, que nun creas que nun caltrié esa mirada que m’echaste, ente pidiendo un gabitu y retándome, pero qué quies que faga. Déxame. Yá procuraré, pa les conclusiones, facer por da-y un poco sencia –lo que pueda, nun pienses que demasiao– a too esto.