El blog de Xuan Xosé: Juliana

Los trabayadores de Juliana constructora anduvieren esta selmana dando vueltes pela Xunta Xeneral, en rogativa, quier decise, buscando'l sofitu (que de nada val) de los partidos más votaos polos asturianos.

Ún desea que les coses se solucionen pal últimu astilleru de Xixón. Polos sos empleaos, pol trabayu y los empleos de les empreses ausiliares, pola riqueza que supón pa Xixón y Asturies la so economía... Deséalo de tou corazón.

Pero, de pasu, invitaría a los trabayadores de Juliana, y al públicu en xeneral, a recordar que la situación actual tien un responsable directu y un cómplice necesariu. Fue'l PSOE el qu'apoyó que Juliana -frente a los astilleros d'Andalucía o Galicia- nun quedare en Navantia, esto ye, nel sector públicu. Y fue UGT la que sofitó la propuesta. Nos dos casos con entusiasmu.

Porque pa ellos Asturies y los asturianos nun son nada. Y porque saben que, además, traten como traten a los que los voten, ye una plaza segura.

Lo que debería facer meditar, non sólo sobre'l votu al PSOE (llamáu "progresista"), sinón sobre la fantasía del votu útil.

vendepatries

El discursu oficial del PSOE, de la UGT y de los sos sostenedores permanentes (CCOO e IU) ye siempre'l mesmu: ellos tán contra les privatizaciones, son los demás los que tán a favor d'elles (y del capital); ellos tán a favor de los trabayadores, son los demás los que tán escontra.

Y, ensin embargu, ¿quién privatizó Juliana? El PSOE. ¿Qué instituciones lo apoyaren? El Gobiernu PSOE-Areces y l'Ayuntamientu Xixón (con IU dientro). De mou y manera qu'una cosa ye lo que fain y otra lo que dicen, los discursos que texen pa enguedeyar nellos a los..., a los... que quieren dexase engañar, porque velo nun ye que nun lo vean.

Pero hai entovía daqué muncho peor qu'esa ocultación permanente la realidá: la traición a Asturies, el sometimientu a los intereses d'otres comunidaes que-yos paecen más importantes, el "Sí, Güana" a lo que-yos manden en Madrid. Porque, na privatización, la UXT y el PSOE dexaren en manes del estáu los astilleros públicos de Galicia y los d'Andalucía, pero non Juliana. Y eso ye una doble traición: a los trabayadores por ser trabayadores, a los asturianos por ser asturianos, porque a esos, que-yos den morciella, piensen, total, van tragar colo que-yos echemos.

Esto ye, y como siempre, PSOE y UGT de vendepatries, y IU y CCOO de palanganeros, como davezu.

Asina nos va.