L'álamu o chopu ye una especie abundante n'Asturies. De la familia les salicácees, esti qu'equí ofrecemos ye un Populus nigra L. Altu, llega algamar los 30 m. Abonda nes veres de los ríos y de los caminos, especialmente onde hai humedá. de lo más calterístico d'el ye'l ruxerrux les sos fueyes, cuandu hai vientu, que recuerden el correr mansino de les agües d'un regatu o ríu.
Les semeyes qu'equí damos pertenecen a dos álamos, na carretera que va de Colunga a Güerres, cerca del cruce de El Foyu, lo que ye agora restaurante.
El chopu asóciase munches vegaes con una seta, la d'álamu o chopu, de bones carnes (o tiez) y de sabor intensu. Les setes siguen dándose cuando se corta l'árbol, nun solo enriba'l caborniu o tueru cortáu, sinón na mesma tierra onde tuvo, aprovechando, supongo, les raíces o daqué elementu residual.
No hay comentarios:
Publicar un comentario