La escuela (la enseñanza) y Gregorio Morán

Lleo casi tolos díes La Vanguardia y, dende llueu, fágolo los sábados. Digo "dende llueu" porque escribe nella los sábados Gregorio Morán les sos "Sabatinas intempestivas". Gregorio Morán, asturianu-ovetense de nacencia, ye un escritor "radical", quiero decir, un escritor que va a la raíz de les coses, que diz coses nueves y que tien una visión propia de les coses, tea ún o non colo que diz.En cualquier casu, inxamás ye un escritor caxigalineru, trivial. Además, la so escritura ye clara, ordenada y culta, y siempre con un puntu d'acidez y ironía, más entá, d'incorrección política de la que pudiéremos llamar "incorreción política d'izquierdes".

Esta selmana l'artículu ye "La derrota más sentida". Nella vien decir sobre la enseñanza, sobre "la escuela", nel so sentíu más latu y antigu, lo qu'otros y yo venimos diciendo fai tiempu. Por exemplu, qu'el problema la enseñanza nun son les perres nin la proporción de profesores por escolín, nin ninguna de les cuestiones de les que falen habitualmente los sindicatos, los responsables políticos, los inspectores, etc. El problema ye que, incluso nos bonos centros de la rede pública, el problema ye dar clase, esto ye, que los alumnos quieran aprender y que durante la clase pongan atención no que faen o lo que se-yos enseña.

Diz tamién otres coses, como la crítica a la propuesta máxico-babaya de da-y un ordenador a cada escolín, y otres.

Naturalmente, si lu empondero y recomiendo la llectura d'esti artículu mui especialmente (como recomiendo la de los sos llibros y artículos), nun ye porque coincida migu, sinón polo qu'él diz y polo cómo lo diz.

Pero, quiciabis, el resumen de tolo que diz, ta na frase que voi poner a continuación, una idea que munchos llevamos espresando décades (yo, que yo sepia, dende'l 79): "Lo más doloroso de la derrota de la enseñanza pública es que la han liquidado los mismos que más la hubieran necesitado".

Invitolos.

Nota: Si nun se m'escapa, los artículos de Gregorio Morán nun tán na web de La Vanguardia, solo na edición impresa. Anque si tan disponibles en formatu PDF na magnífica hemeroteca de La Vanguardia, que permite consulta gratuita dende 1881 hasta 30 díes enantes la fecha actual (una interesante idea/inciativa a copiar por la prensa asturiana).

EQUÍ dexo un modelu de búsqueda de "SABATINAS INTEMPESTIVAS" pa lo que va d'añu.