Ayer, en LNE: Por eso somos progresistes

                                      L’APRECEDERU

POR ESO SOMOS PROGRESISTES

                A finales del sieglu VIII, l’obispu de Toledo, Elipando, sostuvo lo que se llamó la doctrina adopcionista, que predicaba que Xesucristo nun yera Dios ab initio, sinón humanu adoptáu y fechu Dios pol Padre. Dende Asturies aldericó violentamente escontra él Beato de Liébana (autor del guapisimu Comentariu al Apocalipsis), diciendo que taba llocu y llamándolu “coyón del Anticristu”.

                Dende entós, esa pasión poles disputes y les engarradielles doctrinales y teóriques vien siendo una constante na sociedá asturiana, ignoro si por razones culturales o xenétiques (¡vaya usté a saber lo que pasó ente Neanderthales y Sapiens!).

                Por solo venir a los caberos años, ehí tienen el trazáu Unquera-Llanes de l’autovía del Cantábricu, paráu más de diez años nel debate si debía dir pel Valle Oscuru o non. O’l trazáu ferroviariu pel Güerna. Proyectáu nel 1982 y paráu inmediatamente pol PSOE, cuando yá entamó camudó delles veces el proyectu por si debía tener anchu ibéricu o européu, si debía ser compatible con mercancíes o non, según el pesu que’l partíu d’Álvarez Cascos tuviese en Madrid. El casu ye que, venti años más tarde, la cosa sigue ensin finalizar.

                (Pa que s’entretengan: feches que se dieron de terminación. Zapatero: 2009, 2012; Javier Fernández: 2013).

                Y en Xixón, llevamos tamién más de venti años discutiendo en torno a los 300 metros más alantre o atrás de la “futura” estación, y ensin perspectiva d’ella. Y, porque nun falte nada, aquella humorada d’Areces ofreciendo una llanzadera espacial pa los menos de quinientos metros de diferencia.

                 “Lloñe de nós la funesta manía de pensar” glayó’l reaccionariu rector de Cervera delantre de Fernandosétimuusabapaletó. Nós non, nós pensar, repensar, y discutir ensin aparar.

                Por eso la sociedá asturiana ye mayoritariamente progresista, nel votu y nel pensamientu dominante: repiensa les coses.

                (Por ciertu, l’estos díes tan aponderáu Álvarez Cascos tien que ver con eses tres obres tan pensaes y debatíes. Col adopcionismu, que sepamos, non).