Ta de moda falar de los coches llétricos. Dafechu, paez que, por fin, la industria va emponinar nesi sen. Amás d'eso, los coches del futuru van seguramente ser más pequeños y de menos pesu, ensin reducir la protección, con nueves tecnoloxíes de sollertamientu y evitación del peligru.
Alegrámosnos. Pero, otra vegada, tenemos que recordar que ser asturianista significa, nesta sociedá -tan conservadora, tan misoneísta- ver les coses diez años, polo menos, enantes que los demás.
Porque quiero recordar equí que yá fai munchu tiempu (pa les anteanteriores elecciones europees) prosusimos (como un puntu importante del nuestru programa) l'afalamientu dende la UE del coche lléctricu, como fórmula pa enfrentar la dependecia enerxética y, sobre too, pa reducir la contaminación directa. Diez años dempués, paez que los "sabios" (asturianos, españoles y europeos) entamen ver la realidá.
¡Y lo que se rieren de la nuestra protesta! Lo mesmo que se rieren cuando propusimos pagar un canon europeu o mundial polos bosques tropicales y subtropicales (naturalmente, enxerta l'Amazonia) o amparar al cámbaru llariegu de la invasión del cámbaru roxu o americanu.
Por cierto, lo mesmo que se rieren de nós cuando propusimos, va yá más de diez años, allumar l'autopista (o polo menos los cruces) -qu'agora vienen los asturianos xóvenes de la emigración a descubrir el mundu-, facer una selección asturiana de fútbol, o salvar Santullano con una llábana o dar entrada a García Conde con un túnel o... ¿pa qué seguir?
Lo dicho. Ser asturianista n'Asturies nun sólo ye amar a Asturies y a la so xente, sinón ser una persona del presente que mira pal futuru, y, sobre too, tar dispuestu a aguantar babayos de tolos tamaños, dende'l minibabayín al masibabayón.
Claro que a éstos ye a los que la xente-y presta votar.
No hay comentarios:
Publicar un comentario