Como persaben, l'autovía del Cantábricu lleva más de diez años de retrasu. Ún de los tramos qu'acostinen una paralización mayor ye'l de Llanes-Unquera. Esti tramu, aparte la falta pesu políticu de los asturianos, tuvo sometíu a delles denuncies y procesos xudiciales que dieren xustificación pa parte'l retrasu.
Una d'eses causes xudiciales alláncase nel tramu más oriental de l'autovía, yá pa escontra Cantabria. Ellí, los vecinos d'un barriu enteru, los de La Mata, van vese esaniciaos de les sos viviendes pa que pase l'autopista. Lo ablucante ye que l'autopista arrinca a toos esos vecinos del so llar (independientemente de que-yos paguen por ello bien o mal, tarde o nunca) pa evitar esaniciar una aliseda (amparada con una protección especial), de la que debe desviase'l trazáu de la nueva carretera. Per otru llau, l'aliseda yá nun esiste (taba sólo nel bancu de datos y nel planu), darréu que se baltara hai dellos años.
Pero lo ablucante nun ye que l'aliseda esista o nun esista yá. Lo que da que pensar son los valores polos que nos reximos na sociedá contemporánea. Según estos valores, y les lleis que bilten d'ellos, LO IMPORTANTE NUN SON LES PERSONES, SINÓN LES COSES. Esto ye, lo importante nun son los vecinos de La Mata, les sos cases, el so raigañu ellí de xeneraciones, les emociones que los arreyen con esi llugar, cola memoria de los suyos y col so paisaxe; non, lo importante ye la preservación de los árboles o de los paisaxes. De mou y manera que l'autovía tien que desviase pa nun facer dañu a los árboles, pero nun importa si fai dañu a les persones. D'ehí derívense les lleis que llexislen nos parlamentos, les actuaciones de los políticos y l' aplausu nes urnes de los ciudadanos, d'esa premisa: LES COSES POLÍTICAMENTE CORRECTES (O SANTIFICAES POLA MODA) TÁN PERRIBA LES PERSONES.
Deberíanos miramos un poco y referver. Y pensar qué votamos y a quién votamos. Y da-y un par de vueltes a ver si sabemos cuáles son les consecuencies práctiques del nuestru votu (al respective les decisiones) y de lo qu'aceptamos como valores de rangu superior (al respective del fundamentu les decisiones y les prioridaes nes decisiones).
Esta ye el morgazu, la trelda moral y política (social) que'l conflictu pon al descubiertu, tresallá del problema concretu de los vecinos de La Mata, a los que sopelexamos tola nuestra simpatía y apoyu.
Nota: la semeya de "La Mata" de Daniel Bárbara ta sacada de La Nueva España, del 29 de marzu del 2008.
No hay comentarios:
Publicar un comentario