Esti día tuvieren en mio casa de Llastres dos reporteros (o reporteru y cámara, que se me perdone la imprecisión) pa faceme un retayu pal programa "Pieces" de la TPA sobre'l diccionariu. Dambos tuvieren l'amabilidá de sorprendese pol tamañu del Diccionariu asturianu-castellanu y aponderámelu.
Aprovechando qu`a ún d`ellos conocíalu más (tuvo nel so día na Popular Televisión, cuando entá Areces caltenía engañáu al obispu Osoro faciéndolu pensar que diba da-y una llicencia de televisión dixital), falamos un ratu llargu sobre les televisiones llocales y, sobre too, sobre'l trabayu de los profesionales del mediu, especialmente los mozos, y sobre los sos sueldos. Como resumen, y por si dalgún d'ustedes nun lo sabía -que bien lo duldo-, la situación ye permala y los sueldos permiserables. Casi podía afirmase d'ello aquello que Lord Chesterton-y decía al fíu pa desengañalu del sexu: "el placer breve, el costu escesivu, la postura ridícula". Pues eso.Pero mientres la nuestra sociedá nun tome concencia y nun quiera dar un ximielgón dafecho, seguiremos diendo a menos, el país seguirá perdiendo posiciones con respectu al restu d'España y los nuestros rapazos tendrán que seguir diendo fuera pa ganar perres y facese una carrera.
No hay comentarios:
Publicar un comentario