El 03/08/09 esti blog daba un guañu tituláu "Semántica e Irak", y señalaba nél cómo agora los muertos d`Irak, dende que ganara Obama, yeren distintos. Enantes, les muyeres estripayaes, los ñeños estrapallaos, los paisanos arreventaos, les muyeres esparigüelaes yeren víctimes de "la insurxencia". Agora, dende que yá nun ta Bush (Xurdín), les bombes que maten, arrevienten, faen españar, esparigüelen, estrapallen, estripayen, yá nun son de naide. A lo meyor, agora, los muertos yá nun son muertos.
Y, a propósitu d`ello, citaba yo a Hjelmslev: "El que quisiere ser dictador haría bien en aprender semántica". De mou y manera que podía abrise una llinia d`ensiertos permanente nesti blog que se llamare "llinia Hjelmslev".
Pero podemos velo d`otra forma, vamos enuncialo asina: "El reinu de lo políticamente correcho ye`l reinu de la tochura total". ¿Que a qué vien?
Pues si lleemos la prensa y sentimos la mayoría los informativos del llunes 17 d`agostu -y si tenemos el condicionamientu paulovianu de lo políticamente correchu (el reinu del rebuznu "à la page")- podíamos sentinos percontentos (y hasta alliviaos) al ver que`l nuevu gobiernu de la dictadura iraní nomaba dos muyeres ministres. Y hasta dalgunos, de xuru, tarán percontentos porque se convirtió (a lo meyor, polos rezos d`Obama) nun gobiernu progresista. Pero si nos calumbamos un migayín más na realidá, anotamos que les dos muyeres que nomó Ahmadineyad son: Fateme Ayorlu, parllamentaria qu`afitó l`endurecimientu del códigu de la indumentaria islámica pa la muyer, y a la xinecóloga Marzie Vahid Dastyerdi, que defendió que les muyeres tuvieren sólo mélicos muyeres y los homes, homes.
Humanidá, lliberalismu y progresismu, too xunto.
No hay comentarios:
Publicar un comentario