La blanca "La Pelosina" -una triba de gata d'angora- ye la culpable de too. Cerca d'ella, el primer pretendiente, un gatu roxu atigráu. A la cola, otros dos: otru roxu calcáu d'él y ún prietu (los dos qu'asomen el focicu na manzorga la foto onde tán los cuatro). Anque, en principiu, el roxu paez d'estos dos el que tien la primacía (esto ye, el que fai'l númeru dos) hai les sos duldes, porque, de xemes en cuando, el prietu bufa-y al segundu roxu y esti aparta un poco y torna dempués.
En tou casu, el prietu paez el más desesperáu y ye'l más glayador. Les semeyes tán feches a meyudía'l domingu 27 de febreru, y él, el prietu, llevaba miagando al altu la lleva dende la tarde del sábadu y pasó tolo domingu faciéndolo.
A vegaes paecíame sentilu recitar a Machado y el so "Hay que pena debe ser / tener el agua tan cerca / y no poderla beber". N'otres lo que me paecía ye que recitaba'l monólogu de desesperu de Sexismundu en La vida es sueño, aquel "Apurar cielos pretendo, / ya que me tratáis así, / qué delito cometí / contra vosotros naciendo, / aunque, si nací, ya entiendo / qué delito he cometido, / pues el mayor mal del gato / es haber nacido."
Como quier que sea, anduvo col "dale que dale" -de quexase, non de lo otro, que de lo otro ningún fue pa ello nel día-, con unos miaguíos que nun digo yo qu'aportasen dende Llastres a La Griega, pero casi.
Cuando colemos a les ocho la nueche, el gatu prietu seguía col so recital. Quiciabis cansada de tantu allorie, una coruxona blanca que vive perillí llevantaba'l vuelu hacia la viesca cercana.
Por cierto, ¿daquién dixo que vamos pal antroxu?
No hay comentarios:
Publicar un comentario