Dempúes d'unes meses d'actividaes varies (conferencies y charles d'esalumnos, llantamientu d'árboles, esposiciones...), güei llegamos a l'actu institucional del 25 aniversariu (a les 4,30 la tarde na Escuela de Marina) y al actu central (o sea, la espicha, pa qué vamos engañanos).
Nel actu institucional va tar tolo mundu: aparte los directores que fueren del IES -entamando pol primer director y actual inspector, don Jesús Fernández Estrada- y de l'actual, van facer actu de presencia conceyales, l'Alcaldesa, la mio amiga doña Paz Fernández Felgueroso y l'actual Conseyeru de Cultura, don Herminio Sastre.
Nel actu institucional vo falar yo con un pequeñu discursu (daqué menos de 500 páxines), que va tratar sobre'l sentíu del actu (meyor, de la efeméride del aniversariu). Entama asina: Un soneto me manda hacer Violante... Y nun puedo decir más: el que quiera saber más puede dormise ellí mesmu.
Por cierto, invito a tolos mios escolinos pa que pasen a pigaciar, digo, a escuchame. Y, sin nun vais, en tou casu, vamos vemos na espicha que vamos celebrar nel Llagar de Cabueñes.
¡Feliz aniversariu a toos! ¡Trabayu (¿quién diba decir que diben llegar los tiempos nos que pa desea-y ventures a una persona había que desea-y trabayu?)! ¡Y llargos años de vida y felicidá!
Pa toos, p'aquellos colos que me pueda ver mañana y pa los que nun puedan asistir.
Un abrazu efusivu.
Xuan Xosé
No hay comentarios:
Publicar un comentario