Comida navidiega d'Unión Asturianista

El prósimu día 12 d'avientu, Unión Asturianista (PAS-URAS o URAS-PAS, que tanto monta) va celebrar una comida de xeremandía que, per estes feches navidiegues, ye yá tradicional. Ye la quinta que dambos partíos celebramos xuntos y la vixésimuquinta del PAS, que, por ciertu, cumple esti añu que vien los venticincu años d'esistencia (y pal ventiséis pensamos celebralo con un trunfu electoral).

(Por ciertu, y yá qu'andamos estos díes cola tema la unidá. Esta ye, nun fai falta decilo, una xinta d'unidá, o sea, de xuntanza, de xunise, d'axuntase, d'arreyase, de xuncimientu. ¿O vais decime que non?)

Pal que quiera asistir -amigu, simpatizante, curiosu, militante- dámos-y los datos fundamentales:

Celébrase'l día 12 d'avientu, nel restaurante El Pinal en Deva, Xixón, a les 2,30.

El preciu son 30 €.

El menu y el serviciu -puedo xuralo- son bonos, perbonos.

L'asistencia, pal que quiera.

(Los mítines, enantes de comer, nun son mui grandes: másimu, 10 minutos en total).

Perihí vos esperamos ver, y, de nun ser asina, vamos brindar por vós.

Más sobre la unidá (de nuevu al anónimu del 16/11)

Bueno, al final, dempués de tola ex-pressio, de tou esi xagumiar, lo de la unidá nun tenía ná que ver, como suel ser.

En tou casu, y pa suxerir un "decir" más prestosu, una actitú más lliviana, con menos pathos, apunto la llectura de la Rima LXII de Gustavín (Bécquer, non Bueno).

Aclaro, pa camudar el mou, non el fondu, non la postura, que yo creo n'aquello que tan bien espresó Winston Curchill, "el derechu del paisanu corriente a llevantase enfocicáu y camudar el gobiernu col so votu, sólo por eso, por tar enfocicáu". O, arreyo yo, a sofitalu nun votando a ningún, sólo por eso, por llevantase a la hora del desayunu y sentise emberriacáu.

En tou casu, ehí va, un Bécquer prestosu, zuniegu y poco conocíu. Merez la pena lleelu. Él personaxe-protagonista tamién tuviera les sos esperiencies de les que saliera como'l gatu escaldáu:

Primera voz
Las ondas tienen vaga armonía,
Las violetas suave olor,
brumas de plata la noche fría,
luz y oro el día;
yo algo mejor:
¡yo tengo Amor!

Segunda voz
Aura de aplausos, nube rabiosa,
ola de envidia que besa el pie.
isla de sueños donde reposa
el alma ansiosa.
¡dulce embriaguez
la Gloria es!

Tercera voz
Ascua encendida es el tesoro,
sombra que huye la vanidad,
todo es mentira: la gloria, el oro.
Lo que yo adoro
sólo es verdad:
¡la Libertad!

Así los barqueros pasaban cantando
la eterna canción,
y al golpe del remo saltaba la espuma
y heríala el sol.
"¿Te embarcas?", gritaban, y yo sonriendo
les dije al pasar:
"ha tiempo lo hice, por cierto que aun tengo
la ropa en la playa tendida a secar.

Sobre la "unidá" (al "anónimo" del 16/11/09)

Nun guañu entituláu "Llada-La Velilla y otres: mentires y babayaes del PSOE" un anónimu apuntó:

Los Asturianos tenemos facilidá pa munches coses. Ente elles votar al Psoe de forma enferma.Pero tenemos otres.Somos quien a engarranos de la que vamos pa la fiesta y llegar en dos grupos y enfoscanos de la que volvemos p'aportar a casa en cuatro grupos.Esi problema nun ye de los que voten. ¿ Nun te parez?
20 de noviembre de 2009 1:30

Como'l discursu la "unidá" ye un discursu reiterativu -y un esmolecimientu parcialmente razonable- merez la pena decir daqué cosa sobre esta cuestión, al marxen de cuála sea, en concretu, la razón o les postures del anónimu.

Pa entamar, señalar que'l títulu d'esti guañu bien podría ser, envede'l d'enriba, esti: "Pal que nun quier trabayar tolos díes son San Llunes", o esti otru "Pela mañana, rosada; al meyudía, calor; pela tardi mosquitos: nun se puede facer llabor".

Quier decise, en primer llugar, que, dende'l puntu vista subxetivu, la cuestión de la unidá resulta, en munchos casos, una pura disculpa. La mayoría de los que lo dicen, cuerren, ensin embargu, a votar al PSOE o a IU. A ellos, a PSOE y IU, perdónase-yos que sean palanganeros de Madrid, que traicionen a Asturies, que tengan la economía fecha una llaceria, que, na teoría o na práctica, desprecien les señes d'identidá d`Asturies, etc. Too ello, a la hora de votar, nun pesa nada.

¿Qué quier decir eso? Que la patria de la mayoría los que retroliquen cola "unidá" -ignoro si esi ye tamién el casu del "anónimo"- nun ye Asturies, sinón "la manzorga", "l'internacionalismu proletariu", Cuba, Palestina, etc., guiyaes que, al final, siempre los afalen más qu'Asturies.

Pero ye que, amás, dende'l puntu de vista prácticu, eses apelaciones a la "unidá" nun cuenten cola hestoria nin colos actores, ignoro si porque nun saben o si, otra vegada, porque nun quieren saber.

El PAS tuvo en más de dos ocasiones reuniones con dellos partíos del ámbitu nacionaliegu pa llegar a alcuerdos electorales, la última, concretamente, vísperes de les caberes elecciones, y a comuña cola URAS. Pues bien, pa simplificar, ningún de los interlocutores volvió a llamar dempués de la primer reunión, nin siquier pa decir que nun-yos interesaba. ¿Puede esixise, en tornu a la unidá, lo mesmo a unos qu'a otros? Entender que too ye lo mesmo, ¿nun ye, otra vegada, una forma d'escapase de la responsabilidá personal, probablemente pa votar a un centraliegu o quedase en casa?

Pero lo más curioso ye que la unidá yá se fexo. Nes últimes elecciones xuntámonos n'Unión Asturianista (y seguimos) el PAS y la URAS, los dos partíos que, a munchísima distancia, más votos algamaren alcuando nel mundu asturianista. En concretu, y enantes de les últimes elecciones, ente los dos, nel momentu más probe de dambos, 28.000 votos.

Pero claro, eso tampoco yera unidá o esa unidá nun yera satamente la que quería caún de los que queríen la unidá. O sea, otru pretestu. Porque si lo que ye posible y se fai nun val, ¿qué significa esperar polo qu'esiste o ye imposible?

Pues bien, agora, anque nun tenemos representación parlamentaria, tenemos 14 conceyales y 2 alcaldes. Daqué frutu ye d'esa unidá, ¿o non? Podía pensase n'agabitar esi arbolín tienru pa que creza (y, por parte nuestra, tamos faciendo por facelo), pero non. Siempre tien que ser otra cosa.

Bueno, podía decise aquello de que "Cuando por blandiu...", pero non, voi quedame col títulu inicial, "Pal que nun quier trabayar tolos díes son San llunes".

Y, pa la xente asturianista de verdá y de bona conciencia, incluso pa los más roceanos, un conseyu: mirái pal despertador de la derecha, cómo cuenta les hores.

Y, lluegu, mirái pal gobiernu asturianu de PSOE y IU, cómo nun fai ná y se ríe de los asturianos.

Caún qu'escueya.

O, como diz L'Evanxeliu según San Matéu de don Manolín, "El que tenga oyíos p'atolenar, qu'atolene".