Sobre la "unidá" (al "anónimo" del 16/11/09)

Nun guañu entituláu "Llada-La Velilla y otres: mentires y babayaes del PSOE" un anónimu apuntó:
Los Asturianos tenemos facilidá pa munches coses. Ente elles votar al Psoe de forma enferma.Pero tenemos otres.Somos quien a engarranos de la que vamos pa la fiesta y llegar en dos grupos y enfoscanos de la que volvemos p'aportar a casa en cuatro grupos.Esi problema nun ye de los que voten. ¿ Nun te parez?
20 de noviembre de 2009 1:30
Como'l discursu la "unidá" ye un discursu reiterativu -y un esmolecimientu parcialmente razonable- merez la pena decir daqué cosa sobre esta cuestión, al marxen de cuála sea, en concretu, la razón o les postures del anónimu.

Pa entamar, señalar que'l títulu d'esti guañu bien podría ser, envede'l d'enriba, esti: "Pal que nun quier trabayar tolos díes son San Llunes", o esti otru "Pela mañana, rosada; al meyudía, calor; pela tardi mosquitos: nun se puede facer llabor".

Quier decise, en primer llugar, que, dende'l puntu vista subxetivu, la cuestión de la unidá resulta, en munchos casos, una pura disculpa. La mayoría de los que lo dicen, cuerren, ensin embargu, a votar al PSOE o a IU. A ellos, a PSOE y IU, perdónase-yos que sean palanganeros de Madrid, que traicionen a Asturies, que tengan la economía fecha una llaceria, que, na teoría o na práctica, desprecien les señes d'identidá d`Asturies, etc. Too ello, a la hora de votar, nun pesa nada.

¿Qué quier decir eso? Que la patria de la mayoría los que retroliquen cola "unidá" -ignoro si esi ye tamién el casu del "anónimo"- nun ye Asturies, sinón "la manzorga", "l'internacionalismu proletariu", Cuba, Palestina, etc., guiyaes que, al final, siempre los afalen más qu'Asturies.

Pero ye que, amás, dende'l puntu de vista prácticu, eses apelaciones a la "unidá" nun cuenten cola hestoria nin colos actores, ignoro si porque nun saben o si, otra vegada, porque nun quieren saber.

El PAS tuvo en más de dos ocasiones reuniones con dellos partíos del ámbitu nacionaliegu pa llegar a alcuerdos electorales, la última, concretamente, vísperes de les caberes elecciones, y a comuña cola URAS. Pues bien, pa simplificar, ningún de los interlocutores volvió a llamar dempués de la primer reunión, nin siquier pa decir que nun-yos interesaba. ¿Puede esixise, en tornu a la unidá, lo mesmo a unos qu'a otros? Entender que too ye lo mesmo, ¿nun ye, otra vegada, una forma d'escapase de la responsabilidá personal, probablemente pa votar a un centraliegu o quedase en casa?

Pero lo más curioso ye que la unidá yá se fexo. Nes últimes elecciones xuntámonos n'Unión Asturianista (y seguimos) el PAS y la URAS, los dos partíos que, a munchísima distancia, más votos algamaren alcuando nel mundu asturianista. En concretu, y enantes de les últimes elecciones, ente los dos, nel momentu más probe de dambos, 28.000 votos.

Pero claro, eso tampoco yera unidá o esa unidá nun yera satamente la que quería caún de los que queríen la unidá. O sea, otru pretestu. Porque si lo que ye posible y se fai nun val, ¿qué significa esperar polo qu'esiste o ye imposible?

Pues bien, agora, anque nun tenemos representación parlamentaria, tenemos 14 conceyales y 2 alcaldes. Daqué frutu ye d'esa unidá, ¿o non? Podía pensase n'agabitar esi arbolín tienru pa que creza (y, por parte nuestra, tamos faciendo por facelo), pero non. Siempre tien que ser otra cosa.

Bueno, podía decise aquello de que "Cuando por blandiu...", pero non, voi quedame col títulu inicial, "Pal que nun quier trabayar tolos díes son San llunes".

Y, pa la xente asturianista de verdá y de bona conciencia, incluso pa los más roceanos, un conseyu: mirái pal despertador de la derecha, cómo cuenta les hores.

Y, lluegu, mirái pal gobiernu asturianu de PSOE y IU, cómo nun fai ná y se ríe de los asturianos.

Caún qu'escueya.

O, como diz L'Evanxeliu según San Matéu de don Manolín, "El que tenga oyíos p'atolenar, qu'atolene".

6 comentarios:

Solsticiu dijo...

Razón tienes. Esos comentarios de "tenemos lo que mos merecemos",... siempre me paecieron abondo mal. Nun creo que mos merezamos tar como tamos güei, pero sí ye cierto que nestes dómines seudo-nacionaliegues respírase un fedorín de connivencia colos nomaos "pueblos en llucha ó pueblos trabayadores" (que nun son más que gobiernos dictatoriales), y que anteponen esos intereses "izquierdo-internacionalistes" al futuru d'Asturies refugando cualesquier xuntanza asturianista por non respirar el mesmu fedorín qu'ellos

Karl Popper dijo...

ente esos "partíos del ámbitu nacionaliegu" hai un nome qu'entá suena:
IAS (anguaño Unidá Nacionalista Asturiana), pue vese entovía na so vieya páxina web (http://ias.as/contenios/act60.htm)

Hai muncha xente que fala d'unidá de los nacionaliegos asturianos, y yo soi'l primeru que taría por ella, pero hai abonda xente que se diz "nacionaliega" y nun lu ye, nun-yos esmolez de fechu'l País. Ún pue ser d'izquierdes pero primeru ún tien que ser nacionaliegu porque sinon nin hai país en llucha nin país asturiano. Por ende, UNA ya Andecha teníen que tar col PAS y la URAS n'Unión Asturianista. Dempués Dios o la Hestoria diríen.

Ún de los problemes qu'hai n'Asturies ye l'escaezu y el tracamundiu de la hestoria como'l del llibru 1984 de George Orwell.

puxa Asturies llibre!!

Anónimo dijo...

Ya nun m`alcordaba d`esti post. Ye miu, ye decir, soi "anonimu"-
Bueno. Lo primero decite que cuando lu escribi nun taba pensando na unida. Pa decite la verdá ya nin me atrevo a mentala a naide, nin a vosotros nin a los otros. Veolo daqué imposible. Anque, obxetivamente bono.
Otra manera, facer un par de apuntes non por mi, sinon pal casu de que cada vegada que lleas dalgun comentariu como `l miu nun saques eses conclusiones automatiques.
Nun se si tienes razon nel mio casu con eso de San Llunes. Faigo pol pais lo que puedo, y como nun me presta emponderame nin criticame, aceutemos que, de xuru, ye poco.
En política? Ya tube Xuan. Y nun t`entendí.
Dello sacarás que nun soi nada fanaticu de les lluches perdies, nin de les causes estranxeres. Mas bien aburrenme y hasta me dan un poco pol... los que tan doldía danto da murga con elles.
Nin aciertes tampoco en asitiame pa la izquierda. Non digote yo que non.
Sobre lo de votar Pp, Psoe o Ix nun rompo a baxar santos porque cuento que`l to comentariu ye xeneral
Porque eso nun hai quien me lo diga a la cara. ;)
Haiga salu. Que yo unidá nun la espero.
Eso si. Esta vegada tampoco voi votar eh¿.
Mentalizandome dende agora lluegu nun sufro nos recuentos.
Y equi toi d`anonimu, que se yo porque. Pero ya te axunto nel facebook. Que nun hai problema, al reves.

Anónimo dijo...

N'Asturies nun hai nacionalismu. Lo qu'hai ye un izquierdismu llingua-gaiteru. El nacionalimsu ye otra cosa pero ellos nun loq uieren nin ver: nun son nacionalistes.

Anónimo dijo...

Facies bien n`esplicar esto;

"ningún de los interlocutores volvió a llamar dempués de la primer reunión, nin siquier pa decir que nun-yos interesaba".

Mas que nada pa que cada palu tenga pola so vela

Anónimo dijo...

Más de lo mesmo, enroquándose nel discursu de siempres. Xuan, dices que teneis 12 conceyales y 2 alcaldes dende 2007 y yo t'entrugo ¿Cuantos tuvistis per separtáu URAS y PAS en 2003? Y sigo entrugando ¿por qué esi baxón?

Eso del izquierdismu como una torga ye una falacia cola que solo engañes a los que tan engañaos previamente. No nacional, no del país, hai unes concordancies pergrandes ente toos, esceutu la URAS que tovía coxea del sitiu au vien (ay! aquellos tiempos nos que decíes que la URAS yera un PePín, un PP pequeñín...). L'izquierdismu d'una parte del nacionalismu nun ye mayor torga pa la xuntanza que'l lliberalismu de centru-derecha que'l PAS amuesa. Ellos tan tan convencios como tu de que tan nel sitiu correchu, poro, daqué falla.

Faigamos una plataforma ellectoral onde coyamos toos, trabayemos un PROGRAMA POLITICU que seya acetáu por toos y presentemos al país daqué seriu. Depués, si la UNA quier dir a daqué de Palestina y el PAS a daqué de la FAES, que vaigan, pero que la xuntanza y el programa politicu tean perenriba d'ello y nun se vean comprometidos.

Y, saliendome del tema, ¿cuando veremos un articulu tuyu entonando un mea culpa de munches de les coses que pasaron nestos llargos años?