Churchill y el muru. Nel vixésimu aniversariu

Fue Churchill el que fizo popular la espresión "telón d'aceru" ("Desde Stettin, en el Báltico, a Trieste, en el Adriático, ha caído sobre el continente un telón de acero"). El muru de Berlín nun yera'l telón d'aceru sopelexáu por Churchill (fue, per otru llau, más seroñu nel tiempu), pero yera la visualización práctica y simbólica d'esi "telón d'aceru".

Por eso, pa recordar lo que yeren el telón d'aceru y el muru (tan bien vistos, vamos volver repetilo, por una parte la "intelixencia" y la manzorga occidentales -y entá recordaos con señardá por parte d'ellos-) convién apuntar lo que, na práctica, suponíen de falta llibertá pa la xente corriente, y lo que teníen de "dictadura de los señoritos"("señoritos del partíu", pero señoritos), dispuestos a empobinar pela "senda de la virtú hacia'l bien" al común de los mortales, a llevalos hacia "la salvación" inclusu escontra la so voluntá, según aquel asioma tan común a les dictadures de tolos tiempos: "palu al burru blancu, / palu al burru prietu, / y palu a tol burru / que nun ande drechu" (peronde yo lu quiero llevar). Y naide meyor que Winston Churchill pa decir lo que significa de verdá la democracia y lo que nun ye la democracia, llámese "dictadura" a seques, llámese "democracia popular". Son dos retayos de dos discursos del políticu inglés. El primeru, a propósitu del programa absolutista de los llaboristes cuando se convocaren les elecciones al términu de la guerra n'Europa (1945). El segundu, nun debate parlamentariu,cuando los llaboristes acusaben al gobiernu tres la intervención de los británicos en Grecia pa amparar al gobiernu griegu y impedir el golpe d'estáu comunista del ELAS.

Ehí va'l primer retayu:

"Yo defendo la soberana llibertá del individu dientru de les lleis que Parlamentos llibremente escoyíos aprueben con toa llibertá. Defendo'l derechu del home corriente a decir lo que piense del Gobiernu qu'esista, por poderosu que sea, y, asinamesmu, el so derechu a baltar esi Gobiernu si cree que con ello va ameyorar el so humor o va ameyorar la so casa o'l so país, y siempre que, p'algamalo, convenza a xente abondo que vote como él."

Y el segundu:

"Plantéase la cuestión, y ta bien aparase nella nun momentu, de quién son los amigos de la democracia y cómo debe interpretase la palabra "democracia". La mio idea d'ello ye que l'home cenciellu, humilde, común, el paisanu corriente que caltién la so muyer y la so familia, que pelea pol so país y vota cuando toca, señalando con una cruz el candidatu que quier escoyer, ye'l fundamentu de la democracia. Y ye tamién esencial nesi fundamentu que'l talu home o muyer faga eso ensin llercia y ensin dala forma d'intimidación o de peligru personal. [...] Pero nun opino lo mesmo de lo que ye una estafa a la democracia, d'una democracia que se llama d'esi mou a sí mesma sólo por ser una forma de manzorga. Pa facer una democracia necesítase a toos, nun solo a los izquierdistes o a los comunistes. Nun consiento qu'un partíu represente necesariamente la democracia pol fechu de volvese más violentu a medida que se torna menos numerosu. [...] Enunciaré esi principiu nos más amplios y familiares téminos: gobiernu del pueblu, pol pueblu y pal pueblu, afitándose nuna elección por sufraxu llibre y universal, ensin intimidaciones y con elección secreta."