Blanco tomar cabellera con escalpelu

El mio amigu Ramón Díaz y Rebeca Aja recordábenlo'l sábadu 14 d'esti mes na Nueva del Oriente: el tramu Unquera-Llanes de l'autovía'l Cantábricu entamó a tramitase hai 20 años y nun tien pinta d'acabase nin pal 2013. Nel reportaxe señala que se ta tovía nel movimientu de tierres y que malapenes hai trabayu na mayoría los tramos: escargátase un migayín equí, xúrgase un pocu ellí, carrétase una mozaína tierra d'acá p'allá, rócense dos sebes, báltense dos mates, ná: cagalera en campu rasu.

Equí, como nel tramu occidental, como nel AVE too son retrasos y falta perres y voluntá política. El señor Blanco (y tol PSOE, los d'equí, incluidos Javier Fernández y Areces, de palanganeros y celestines) faen más que tomanos el pelo: arránquennos la cabellera entera col escalpelu: yá saben ellos que más de la mitá la población -como los mártires cristianos, al igual que munchos de los guillotinaos de la revolución francesa, neto que los de los xuicios de Moscú- ponen gustosos la cabeza pa que los tosquilen, nel entendimientu de que too ello ye pol bien de la humanidá, del progresu, de la clase obrera y del progresismu.

Que la traducción de toa esa retórica de beneficiarios sea dempués otra: que los beneficiaos reales sean los catalanes, los andaluces y otros nun-yos importa: ellos tán dispuestos a morrer (ensin autovíes nin AVE) pola fe y empobinar al supliciu cantando salmos de gloria al que-yos toma'l pelu y -yos esvacia la cartera pa dá-yosla a otros.