Manifestélo'l xueves pasáu na tertulia la COPE, escontra otres más roceanes: en principiu nun hai que pensar otra cosa del encloyamientu de la CCM por Cajastur, sinón que ye necesariu y que seguramente va dir bien.En primer llugar, porque Cajastur tien (tenía) pocu tamañu, y con esi tamañu tenía problemes pa la so sostenibilidá nun futuru non mui llargu, colo que taba abocada a fusiones o aliances más o menos inmediates, a lo meyor non deseades; o, dotra miente, a llimitar la so capacidá d'actuación -y empeorar los sos balances-.
En segundu llugar, porque l'equipu qu'actualmente empobina Cajastur ye un equipu sólidu y fiable (ente otres coses, a la vista los resultaos) y porque la so situación política ye sólida, esto ye, tien una independencia razonable pa xestionar la Caxa como un proyectu bancariu. Esa situación política ye sólida por dos razones: la primera, porque escapó del intentu d'abordaxe políticu d'Areces y los suyos nel añu 2000; la segunda, porque afuxó, asinamesmo, de la tentación de convertise n'inversora n'empreses imposibles, escapando tanto de la presión sindical como de la empresarial, pa que se convirtiese "nel motor industrial y empresarial d'Asturies" (pa que senllamuergase, por exemplu, nel naval o n'otres guedeyes y rodielles apaecíes desurdíes nestos caberos años).Agora, dende güei pela tarde, a esi análisis hai que sumái l'ésitu de la operación.
Vamos esperar agora que los pilancos que van arreyaos a la operación (aeropuertu, casinu, pasivos) puedan sortease bien.
No hay comentarios:
Publicar un comentario