Tán dexaos de llau. Por toos, polos partíos, polos sindicatos “de ciudá”, polos ciudadanos en xeneral. Y, ensin embargu, ellos son el caltenimientu últimu del país no económico y no vivencial. Ye más, al so ámbitu, al campu y a la cultura rural debémos-yos muncho de lo qu'entá somos, de les nuestres vivencies, de la nuestra visión del mundu, de los nuestros valores, de la nuestra llingua, del nuestru paisaxe. Nun sólo n'Asturies: en Castiella, n'Andalucía, en Valencia, en Cataluña… Son munchos sieglos d'un ser únicu, el rural, pa que sea esaniciable la so güelga.
Ye más, too eso que llamamos güei naturaleza nun ye más que naturaleza donda, que mundu tresformáu pola acción de l'agricultura y la ganadería, pol trabayu de sieglos de los paisanos (que son tanto homes como muyeres).
Pues bien, de cuatro años p'acá vienen viendo cómo, nun país onde toles rentes crecíen les d'ellos nun lo facíen; cómo, cuando tolos costos subíen, ellos nun podíen treslladalos a los precios. Y agora, nos dos últimos años, tán viendo cómo la disminución de riqueza colectiva y l'abaratamientu de los comestibles tóca-yos a ellos pagalu, porque la presión última produzse sobre los precios que se paguen polos productos agrícolas. Y nun ye que dexen de ganar, ye que, na mayoría los casos, los ingresos nun abonden à cubrir los costos. De nun tar tán empodrellaos cola tierra (por formación, por tradición, por deldes, por falta d'otres salides) ¡cuántos nun diben dexalo darréu!
Y son tolos sectores: la carne y la llechi, l'algodón y el trigu, l'ablana y l'aceituna, l'alfalfa y el xirasol…
Asina que la manifestación del sábadu 21 nun ye más qu'una esplosión tardía de xente sometida a la inxusticia y desesperada.
El nuestru apoyu y la nuestra empatía dende equí.
¿Será esti gobiernu d'inútiles (los dos, el d'equí y el d'ellí, el zapateril) capaces de char una gabita?
Ver veremos.
1 comentario:
A ver hom.
You de mano teolo claro, nel campu dase un estilu de vida que fairía nel casu de llevar una política ruraliega más fuerte caltener más población nas aldeas ya parroquias rurales asturianas.
Los políticos teníais que velo asina: Con mayor población nel campu solucionanse munchos de los problemas d'Asturias:
-Problemas d'almacenamientu de basoria: Con mayor población nel campu, la xente pue pa la sua finquina, pa la sua pomaradina, pa la sua hortina poner plantas de compostaxe caseras, ya gran parte de los desfeichos orgánicos diban apreciase pa facer abonu.
-Abaratase la vida: Porque digan lo que digan val más tener una pomaradina, viñina, hortina, finquina (pa usu caseiru), d'óu sacas un aproveichamientu, que nun tener nada. Aquello val más que tener la finquina a bardayu, esperando que te caiga un eólicu. Eso pasa nel Occidente por malos vezos.
-Porque nel campu caltiense meyor la cultura asturiana; yía'l gran depósitu que tien, ya d'áu remanez la llingua, música, folclor, tradiciones, mitoloxía, creencias... ensin menospreciar las aportaciones de l'Asturias más urbana ya industrial, pero nel campu caltiénse más. D'outra manera igual.
-Porque'l modelu d'esplotación que quieren facer del campu yía insostenible. Eso vese namás cuando falas con un ganadeiru, nun se pueden caltener aquellas esplotaciones d'esta manera, somos asturianos ya cuesta muncho facer las cousas d'esta manera. Nun se pue cambiar el campu tradicional a una esplotación capitalista cumo ellos quieren, porque perviven costumes que tán bien enraigonadas ya falta esperiencia, ya amás el campesín asturianu, probe sí, pero esclavu non.
-Porque n'Asturias dase un problema de falta de población ya de masificación excesiva nel centru d'Asturias; llou apaecen los "Caliaos". ¿Cúmo nun país tan lluviosu cumo ésti vei facer falta augua? Cuando amás las previsiones dan qu'ante'l cambéu climática Asturias vei vese pouco afectada. Eso yía por una mala política, pa dalgo tenemos Autonomía ya gobiernu Autonómicu, cuido pa min qu'había fomentase'l vivir nas alas (especialmente na occidental) ya non atropar la población nel centru, que vei paecer un gallineiru.
-Finalmente, porque Asturias, con pueblos cuidaos ya guapos, gana en guapura, n'ecoloxía ya n'identidá, en población ya en riqueza económica.
You polo menos asina lo entiendo, ya d'ehí que volva pal pueblu míu, en Salas. Al final yía óu meyor se ta, ya unde más feliz soi; óu más asturianu se fala, unde más vivas tán las tradiciones d'esti país, ya óu más llimpiu ya l'aire. Ya unde más cuartos aforro...
Publicar un comentario