Al rodiu de la crisis d'El Pexín (Alakrana) podemos establecer un catálogu de metedures de pata y de mentires clamoroses del Gobiernu. Puestos a xulgalu, ye evidente que nun ye responable del secuestru, como tampoco lo ye de pagar (¿tou, parte?) del rescate, pero sí lo ye de munches coses.Ehí va la llista:
- a) negase a ver la realidá peligrosísima de la costa occidental d'África, y, en consecuencia, dir tomando siempre medíes arrastráu polos acontecimientos, esto ye, por un grave sucesu anterior.
- b) llexislar como si la realidá nun esistiese, y como si nunca l'exércitu español se fuese a ver con un rehén nes manes que tendría qu'usase como una pieza de negociación o fuerza puesta nel tableru. (A esti respectu ver los dos ensiertos míos anteriores "Acéfalos legislantes" y "Acefalísimos legislantes").
- c) Nun dexar qu'actúen les fuerces armades como tales, nin pa asaltar el barcu (opción discutible), nin pa detener dempués a los pirates, nin pa dispara-yos dempués de colar del barcu (pela cueta los franceses sí lo faen, los portugueses detienen pirates, como acaba de sabese'l 19, xueves).
- d) mandar traer a España a los dos pirates capturaos inicialmente.
Mentires (mentirones): - a) Char la culpa a la Audiencia Nacional de traer a los pirates a España (fue'l Gobiernu'l que dio la orden).
- b) decir que teníen llocalizaos perfectamente a los tres marineros que, según los pirates, ficieren desembarcar (puesto que nun los ficieren desembarcar, mentíen al confirmar la noticia y mentíen al decir que sabíen ónde taben).
- c) enfallentanos al decir que la detención de los pirates falló por dos minutos, que los pirates fueren nadando a tierra, que nun acertaren al dispara-yos, etc. (La única verdá ye que o mandaren nun intervenir o dieren orden de disparar con pricuru de nun da-y a ningún pirata, de nun herir nin matar a naide).
¿Nun merecemos un gobiernu que nos mienta y, al mesmu tiempu, sea una tropiella d'inútiles y de torgaos? Sí lu merecemos, pues que lu votamos, entá conociéndolu.
No hay comentarios:
Publicar un comentario