El xueves pasáu, la presentación de Dende a llareira con señardá. Cocina de Bual y del occidente asturianu tuvo un gran ésitu de públicu (más de cien persones) y de crítica (a través de les palabres del presentador, José Antonio Fidalgo Sánchez, que nun pudo asistir por enfermedá pero que fueren lleídes nel actu).
Doi equí unes palabres que sirven d'entamu al llibru, escrites pola mio persona:
ALDADOIRU
El llibru que tienes ente les manes, amiga llectora o amigu llector, nun ye únicamente un llibru de cocina (que lo ye y bonu: bayurosu en recetes, precisu, concisu y claru), sinón que tien otres munches virtudes de les qu'alimenten, éstes, l'espíritu o l'ánimu, como se prefiera llamar.
Non ye la menor d'eses virtudes la riqueza llingüística, el tar escritu con una llingua clara, directa y tresparente, que, xunto cola referencia a les coses, tráenos tamién l'arrecendor de les emociones, les sensaciones y recuerdos que s'arreyen y enguedeyen (como unes cereces con otres) coles palabres.
La emoción y la señardá del recuerdu nun son una virtú menor d'esa escritura (y, polo tanto, d'esti llibru); una emoción y una señardá que caltrien les recetes y les llinies y que nos fain desurdir costumbres, vezos, comportamientos sociales que son entá los nuestros y yá nun son los nuestros, como apunta reiteradamente María Teresa. N'otres palabres, coles recetes y la memoria de l'autora vienen prendíos los nuestros güelos, los nuestros pás (perespecialmente, como ye natural tratándose d'esta materia, les nuestres güeles y les nuestres mas) y aquel tiempu casi inmediatu nel que munchos de nós fuimos y vivimos y comimos (y, polo tanto, y en consecuencia, somos).
Y finalmente, pero de non menos pesu y sustancia, ta la esquisita sensibilidá y emoción de l'autora, tan, por decilo de daqué manera, “panteísticamente social”. Anúbrese detrás de cada receta, apaez, tala una llugada de sol, ente cada comentariu, alluma en cada datu del recuerdu.
Que les papiles gustatives y olfatives de la sensibilidá d'ustedes sean pa saborguiar y degustar tolos matices d'estos espirituales o emocionales alimentos, al empar que lo fai colos platos y recetes que nel llibru s'asienten.
No hay comentarios:
Publicar un comentario