El prósimu 24 de marzu, martes, a les ocho la tarde (20 hores), na Sala de Conferencies del Antigu Institutu Xovellanos, en Xixón, y organizao pola FUNDACIÓN NUEVA ASTURIES, van presentase los llibros Mundu saber y decir nel refraneru y Ría del Eo (España y Asturies: futuru y coyuntura).Mundu saber y decir nel refraneru, de Xesús Cañedo Valle y Xuan Xosé Sánchez Vicente, recueye una riestra de refranes ordenaos temáticamente y, asinamesmo, ensierta un par d`estudios, ún sobre la definición de paremia y les formes asemeyaes a la paremia, asina como sobre la asturianidá del refraneru; l`otru versa sobre`l refraneru de la salú y la melecina. Neto que llibros precedentes de dambos autores tocántenes a esti campu de la erudición y del saber tradicional asturianu, el llibru contién novedaes y enfoques estremaos de los de trabayos anteriores.
Ría del Eo (España y Asturies: futuru y coyuntura), de Xuan Xosé Sánchez Vicente, contién una selección de los artículos asoleyaos na prensa del país pol escritor y Presidente del PAS. Según el títulu indica, les materies enxertes nél nun son solo les referíes a Asturies y a la nuestra sociedá, sinón otres atinxentes a la economía española, a la situación d`Euskadi, el estatutu de Cataluña, etc., y delles otres d`ambitu européu o mundial.La presentación de los llibros van facela, respectivamente, Sergio Marqués Fernández y Xesús Cañedo Valle. Sergio Marqués Fernández fue Presidente d`Asturies y ye actualmente Presidente Honorífico d`URAS, Xesús Cañedo Valle ye Secretariu Xeneral del PAS.
A LOS ASISTENTES VA ENTREGÁSE-YOS GRATUITAMENTE UN EXEMPLAR DE CAÚN DE LOS LLIBROS.
1 comentario:
Queriu Xuan, guardaime un pa mi!!
Un abrazu!
Publicar un comentario