Nos ensiertos del 10/02/09 y del 07/02/09 apuntamos, respectivamente, el dineru que damos los españoles a los partíos políticos y les perres que deben los partíos a los bancos. Tocántenes al dineru que damos a los partíos consta sólo'l qu`apurrimos directamente dende l'Estáu, al traviés de les organizaciones que tienen representación en Cortes. Arréyen-y agora lo que se recibe de les diputaciones, de les comunidaes autónomes, de los ayuntamientos y per delláu.Agora damos noticia de les perres que reciben les principales organizaciones sindicales, CCOO y UGT, que son 6.446.508,86 € a los primeros y 6.092.257,09 € a los segundos, en función de la so representatividá. Por participar nos muérganos consultivos del Ministeriu de Trabayu, reciben, caún, 1.024.820 € y 1.199.337 €.
Empobino pa tolos datos al BOE del 28/01/2009, onde, además, apaecen otres trenta y pico organizaciones sindicales y la CEOE que recibe 2.156.976 €, tamién por participar nos muérganos consultivos del Ministeriu de Trabayu.
Y, al respective de les perres que reciben CCOO y UGT —dambos sofitos evidentes de los sos socios políticos—, tenemos que volver a recordar qu'esi dineru, sumao al que los partíos políticos reciben de les instituciones, al que reciben per delláu y a los pufos colos bancos fain una cantidá enormemente bultable a la qu'hai que sumar la presencia diaria nes televisiones y nos radios, nos medios públicos, nes gacetas municipales, nes televisiones llocales, etc.
Y agora vamos referver, ¿cuála ye la dificultá pa competir con esta xente dende partíos que nun meten la mano nel bolsillu los ciudadanos, como los que formen Unión Asturianista, PAS y URAS?
No hay comentarios:
Publicar un comentario