Segismundo en Llastres

O meyor, n`El Piqueru, en Llastres, onde tengo la mio segunda residencia. Resulta qu`El Piqueru ye un barriu onde abonden los gatos. Hai gatos (gates) que lleven yá varios años viviendo na cai y que, a cada triquitraque, tienen una camada de gatos. La más piquera de toes elles ye, ensin dulda, La Nuria, que ye la más paisanera y tamién, según aponderen les vecines, la meyor madre, la más criadora y cuidadora.

El casu ye que les gates del vecindariu lleven una selmana d`antroxu desenfrenáu (ignoro si agostu fue siempre asina, si ye`l cambiu climáticu o si se trata del peligru de la prosimidá del perru de San Roque -yá se sabe qu`hai sesualidaes que s`encienden col peligru-), d`antroxu desenfrenáu, digo: tásquense peles paredes, retuércense escontra el suelu, arretorcigáñense como blimes, ximiélguense y encuéyense sobre les pates, espurren el cuerpu, llevanten y ofrecen los cadriles..., toes, La Pinta, La Canela, La Blanquina, La Birola..., y, a la rodiada, cómo non, esperando`l turnu, el Solombra, el Mediasolombra, el gatu Les Monxes (¡Xesús!) y otros innominaos. Con pocu pudor, con poca vergoña: nel alféizar la mio ventana, nel estragal la mio puerte, al meyudía, a les dos de la mañana...

¿Y Sexismundu? Ehí vien la cosa: toes estes nueches sentía yo fuera, a la mio espalda, tres les contraventanes, nel caneyucu que separa la mio casa de la del vecín (non más d`un metru), mientres nel mio despachu trabayaba nel ordenador o lleía, unos miaguíos como de lloru, como de gatín abandonáu, y yo pensaba: debe haber ehí un gatuxu al que nun-y dan de comer, quiciabis el güerre d`una llechugada al que tengan abondonao o al que nun-y toque mamar por ser eso, el güerre. Y los miaguíos seguíen nuechi tres nueche, na oscuridá, como un llamentu, como una llamada de socorru.

Hasta qu`ayeri descubrí d`ónde desurdíen. Yeren del gatu del vecín, que nun tien más vista a la cai (al caleyón del qu`enantes falara, en concretu) qu`un ventanín cerráu por una tela metálica, como una fresquera. Dempués d`observalu, caí na cuenta de que pasaba nesi aprecederu-fresquera (con más propiedá, nesti casu, dende la perspectiva del músaru: nesi auditoriu-golifatoriu) más de la metada del día, adicando pa fuera, y que pela nueche yera cuando llanzaba les sos quexes o miaguíos.

Tarde dalgún tiempu n`alvertir qué yera lo que decía durante aquelles hores nocherniegues nes que yo lu sentía llancir: yera, cenciellamente, la mesma quexa de Sexismundu en La vida es sueño de Calderón, cuando, al vese ente cadenes de por vida -sólo qu`elli sufría menos, porque nun tenía a toles femes de la rodiada en celu, ximielgándose, arretorcigañándose, agullando, arreciendiendo a fema- recitaba`l so famosu monólogu:

"¡Apurar cielos pretendo / qué delito cometí / contra vosotros naciendo, / aunque, si naci, ya entiendo / qué delito he cometido [...]", que, como vustedes recuerden, sigue: "Nace el arroyo, culebra / que entre flores se desata, / y apenas sierpe es de plata [...]" y llega al estribiellu: "¡Y teniendo yo más vida, / ¿tengo menos libertad?"

Anque seguramente`l gatu del vecín recitaría aquella otra variante popular, más porcaz pero más espresiva, qu`entama: "Nace el buey, y con la vara / que le da naturaleza, / apenas se le endereza..."

Porque asina son les coses, bayura pa unos y fame pa otros.

¡Ah, nun crean qu`esto ye una alegoría! Acompaño la semeya de Sexismundu, digo, del músaru naguador y afamiáu del vecín.