D'invitaciones y rosníos

La mio costume ye dexar que, tanto nel blog como en FACEBOOK, la xente, incluso los más pesaos, digan lo que-yos preste. De mou y manera que, salvo insultos, la xente puede dexar les sos idees, aportaciones, crítiques, caxigalines o rosníos. Ye más, raramente fago comentarios o retruques a lo que s'inxer nos ensiertos.

Nel de la inauguración de la sede central en Xixón, que llevaba'l títulu de "Tais invitaos" (ver equí) un ciudadanu atrevíu posó dos notes. Nun pensaba retrucar, pero la intervención de "Xuanín Pandiella", que complica y confunde les coses, oblígame.

• 1. "Invitar" y "convidar" tienen dambes la mesma raíz "invitare" y signifiquen básicamente lo mesmo, tanto n'asturianu como en castellán. De les dos, evidentemente, "invitar" ye más seroña y culta.

• 2. Toles acepciones del asturianu "convidar" tán tamién nel castellanu "convidar", especialmente nel antigu y nel rural de güei. Pueden vese nel Diccionario de Autoridades o recordar el gongorín "La dulce boca que gustar convida / un perfume entre perlas distilado..."

• 3. "Invitar" y "convidar" son dambes asturianes y vienen significar lo mesmo, con dalguna restricíón nel so usu. Asina, por exemplu, puede "convidase" o "invitase" a una copa, anque pa dalgunes sensibilidaes "convidar" sea más asturiano y tamién más propio de xente mayor o de les zones rurales. De fecho, l'Academia arrecueye "invitar" y "convidar", y prefier esta, puesto que ye la que recomienda na entrada "invitar".

• 4. Xunto col campu semánticu común, "invitar" y "convidar" tienen especificidaes non superponibles y, a vegaes matices connotacionales distintos. Por exemplu, como recueye l'Academia, el términu "invitación" pa designar la tarxeta que se manda pa invitar o convidar nun tien equivalente dende "convidar". Del mesmu mou, "convidada" -una invitación xeneralizada- nun tien satamente les mesmes connnotaciones -ye más espresiva- que "invitación".

• 5. En tou casu, como pon el diccionariu de l'Academia, "convidar" escríbese con "v" y non con "b" (porque vien de "invitar", según yá señalaba el Diccionario de Autoridades).  

• 6. Finalmente: dalgún día tengo que señalar cómo funciona esi vector del "aldeanu atrevíu" (xente que cree que conoz el mundu y nun sabe siquier de la so quintana) como un vector definitoriu de la conducta d'una parte pequeña del asturianismu. Los exemplos -delles veces de comportamientos grotescos- desplicarán munches hestories de les que padecemos güei, dalgunes, por exemplu, relatives a la cooficialidá y a otres coses.