Republicanismu federal

La Xunta Xeneral del Principáu y l`Ayuntamientu de Xixón acaben d`asoleyar el Proyecto de Constitución Federal del Estado Asturiano, de 1883. El testu ta fechu pola asamblea asturiana del partíu pimargallianu y enxértase nuna serie de testos d`esa mena que, col porgüeyu d`un estáu federal, entamen en delles partes d´España los federales n`aquel momentu.

La publicación, desconocía hasta agora, vien a enanchar la tradición nacionalista y asturianista del nuestru país, de la que yá señaláremos cómo tuvo nel pasáu una gran importancia, que llegó hasta la Guerra Civil.

D`esa complexidá ficimos nosotros una primera aprosimación, al entamu del añu 1997, nun conxuntu d`artículos asoleyaos nel diariu Les Noticies, conxuntu de testos que dempués asoleyamos en Teoría y práctica d`Asturies (Fundación Nueva Asturies, Xixón, 1999). Ellí señalábamos la militancia nel federalismu de personaxes como Tomás Zarracina, Eladio Carreño, Félix Aramburu o "Pepín de Pría". Convién anotar tamién que, según apuntáremos n`otru testu d`investigación e interpretación hestórica, "Rexonalismu/Nacionalismu asturianu, un sieglu: 1839-1936" [Ríu Nalón (Estudios lliterarios y llingüísticos), Fundación Nueva Asturies, Xixón, 2005], el Partíu Republicanu Federal fue l`únicu que, durante la II República, tuvo aperiáu un estatutu d`autonomía p`Asturies, del que nun sabemos ná.

Del partíu Republicanu Federal, que tuvo una escisión na segunda República, fue presidente de 1933 a 1934 (y ye ésti datu que ye poco o nada conocíu) Benigno Fernández Fernández, que dempués fue mandu (capitán) de la Intelixencia Militar del exércitu asturianu, y que, como cuento na mio novela No miréis al mar, dio un golpe de mano importante rescatando del Simanques un grupu de prisioneros, nuna incursión a punta de pistola.

Con posterioridá, y con munchísima mayor fondura, estudió toes estes cuestiones Pablo San Martín, fundamentalmente nel so Asturianismu políticu: 1790-1936.

Too ello, per otru llau, vien desvelar la complexidá y fondura de la tradición asturianista y nacionalista asturiana, y l`apropiación de la hestoria pola izquierda centraliega, construyendo sobre`l pasáu una mitoloxía reduccionista, talamente equivalente a la de la derecha.