La parada -vamos esperar que temporal- del fornu altu d`Arcelor ye un desastre, anque yá s`esperare. Detrás d`ello van venir más cierres d`empreses y más despidos. La riada va entamar enriba en puertu, pero nun va llevar per delantre solo a trabayadores d`Arcelor y de les empreses ausiliares. A medía que vaiga baxando pel valle y corriendo pela llanada hacia la mar va emburriar empreses de servicios, tresportistes, hosteleros, quiosqueres, rapaces d`alterne... Y, pa enriba, retroalimentar el mieu a la inversión nos que tuvieren pensándolo.
¡Una auténtica desgracia p`Asturies y pa tantos asturianos!
Hai que recordar que fai un mes el futuru fenómenu, Javier Fernández auguraba qu`eso n`Asturies nun diba pasar (que pa eso taba Zapatero) y que, en xineru d`esti mesmu añu, los sindicatos aseguraben que nun diba haber despedidos nes empreses ausiliares d`Arcelor. ¡Tropiella más gorda d`ineptos y embusteros nun entra en prau!
Tampoco tará mal traer a la consciencia que fai cinco años, nel 2002, pa les anteriores elecciones europees, toa esta tropiella andaba saltando y blincando de contentu col Protocolu de Kioto. Ná màs que nosotros avisamos de los problemes qu`eso diba traer pa la gran industria asturiana, tanto polo derechos d`emisión como, sobre too, pola tarifa eléctrica. Hasta agora, y al respective, el PSOE, los sindicatos, don Vicente Alberto y el futuru fenómenu, Javier Fernández, nun ficieren más que rascase l`embeligru y tascase contra`l presupuestu.
Nota: el PP nun solo rebiyaba de gustu en prau col Protoclu de Kioto, sinón que fuera él el que lu firmara, con Aznar y Rato a la cabeza. Y el coru de gües mansos d`equí berraba de placer pol sal que los sos amos chaben pa los otros toros de la manada.
No hay comentarios:
Publicar un comentario