¿Pa esto ganamos la guerra!

Estos díes PSOE e IU anden reburdiando y quexándose de la Sindicatura Cuentes y dicen que "son la principal palanca del enemigo". Esto ye, por si vustedes anden despistaos, la Sindicatura Cuentes vien denunciando, nos últimos tiempos, los chanchullos del Gobiernu de PSOE e IU, los presupuestos escedidos, les contrataciones d'altos cargos ensin xustificación o con un sueldu de meter mieu (envidia, más bien), etc.

Agora bien, la Sindicatura cuentes nun ta en manes del PAS, nin tampoco del PP, ta en manes d'Avelino Viejo (propuestu pol PSOE y arreyáu a esta organización), Antonio Arias (propuestu por IU y arreyáu a ésta) y por Mercedes Fernández (propuesta por y arreyada al PP). En tou casu, toos ellos son persones con capacidá, méritu e independencia.

Hai que recordar, además, que la Sindicatura Cuentes, un organismu probablemente prescindible por costosu nuna comunidá como la nuestra, ye un enfotu que persiguiera IU durante munchu tiempu y que dempués agabitó a crear el PSOE. ¿Qué ye lo que-yos pasa entós?

¡Hai, hom! Que, como decíen los franquistes dempués de la contienda y como yo sentí decir a munchos del PSOE dempués del 82, ¡PA ESTO NUN GANAMOS LA GUERRA! Si nun ye pa colocamos toos nosotros, pa char una mano a los amigos y p'atapar los chanchullos, chanchullonos o chanchullinos, ¿pa qué ganamos les elecciones? ¿Y entós esto de la Sindicatura pa qué lo ficiéramos? ¡Home, pa perseguir a los del PAS, y a los del PP! Pa escazobiellar les cuentes de los que nun sean nuestros, pa amoriar a los alcaldes de los ayuntamientos onde nun gobernemos? Si non, ¿pa qué?, ¿pa qué dibamos tener ganao la guerra?

Pero, por desgracia pa ellos, escoyeron a persones independientes, honestes y con pudor, que cumplen col so deber y (anque seliquino) dicen lo que ven.

De mou que lo que tienen que facer el PSOE y IU pa la prósima ye quitar a estos síndicos y poner a otros más arroposaínos y que sepian bien quién-yos da de comer, ¿que qué va ser esto! De pasu, en cuantes nomen los prósimos con esi calter afayaízu, podíen camudar el nome de la institución y ponéi uno nuevu: "Sindicatura del anubrimientu de los nuestros chollos y del sopelexamientu de los ayenos (masque sean figuraos)". Y a los nuevos síndicos camuda-yos el nome. Llamalos: Palanganeru uno, palanganeru dos, palanganeru tres.

Porque camudar la zuna y pasar a facer les coses bien, ensin anomalíes nin chanchullos n'Alministración, ¿nun creerán vustedes que van ponese a ello, non?