AVE, mentires, esixencies

Sea la que sea la solución pal futuru tren que crucie El Güerna per baxu y que llegue hasta Xixón, nun va poder pasar pel tunel embaxu'l xerrón a más de 220 per hora (ente L.lena y Xixón nun va dir más allá de ser un tren convencional). Con tou y con ello el Gobiernu asturianu, a través de Francisco González Buendía, sigue calteniendo que'l futuru nuevu tren va cruciar a más de 300. Yá se sabe: el Gobiernu d'Areces ye un gobiernu lliterariu d'un solu xéneru: el cuentu.

Per otru llau, ún que tuvo nel Congresu los Diputados pa ensertar la variante d'El Güerna nel PDI (y que, polo tanto, tien daqué parte en que vayamos algamar el nuevu trazáu) y que tuvo tamién nel llantamientu de la primera piedra la obra en L.lena nel so día, allégrase del barullu que suponen les palabres de Francisco Álvarez Cascos, impulsor -vamos decilo con claridá- decisivu del nuevu trazáu.

Porque equí, si nun s'espatuxa, tanto'l PSOE como'l PP traguen lo que-yos echen (digo siempre qu'esperen les órdenes de Madrid nel primerl movimientu de buxarronismu). Y, polo xenerao, la sociedá asturiana o anda sorda, o ciega o ta ensin voz (o fai como que lo ta).