A lo que más se paez la mayoría del debate políticu ye a una berrea. Una eshibición de roídu, trompazos y mexu pa marcar el territoriu con un únicu oxetivu: montar la fema, esto ye, al votante. Nada en beneficiu`l votante (salvo beneficiáselu), nada en beneficiu la sociedá, todo pa la satisfación (y el negociu) del berreru. ¿Hai más? Sí, hai más, pero nun ye lo más: lo más de l`actividá política n`España y Asturies ye eso, berrea.
Un episodiu de munchu contenidu feromónicu y aturullador tenémoslu estos díes nos berros con que nos aturullen PP y PSOE sobre l`aprobación conxunta del presupuestu pal 2010. Yá saben de suebra los del PSOE que nun van sumar pa eso a los del PP (nin-yos interesa), yá persaben los del PP que nun van sumase a eso colos del PSOE (nin-yos interesa), pero unos y otros esberrexen y atroneyen los aires como si fuese de verdá. Y nun va ser asina, entre otres coses, porque, además de nun interesar a ningún, el presupuestu tien los votos aseguraos con IU, ¡QUE SON SOCIOS DE GOBIERNU!Lo más curioso d`esta berrea ye qu`ello supón l`asobaye y el ningunéu de IU por parte del PSOE: porque si yà los tien ehí, ¿pa qué los quier? Y, si contase con ellos pa los votos, pa contar colos del PP tenía que facer polítiques contraries a los sos socios. ¿O ye que, de tener los votos del PP, diba char del gobiernu a IU?
Lo dicho, ningunéu y asobayamientu de IU por parte del PSOE.
Y, énte esa situación, ¿IU que fai? Pues cumplir aquelles condiciones que la ratina del cuentu ponía a los sos pretendientes pa que pudiesen casase con ella: "comer y callar". Y agachase, nun sea que, machu villanín, de poca alzada, lu vaya estrapallar dalgún de los dos machos grandes que, frente a la fema, finxen tar en celu y mexen y esberrellen como si lo tuvieren.
No hay comentarios:
Publicar un comentario