Hasta agora nun dixe nada sobre l'asuntu La Campa Torres. Paecíame tan fuera'l mundu, tan escandaloso que pensaba que tenía qu'haber una esplicación en daqué sitiu: que sí se tuvieren entregaes les pieces de la escavación y qu'un error burocráticu o un camudamientu de responsables perdiera l'archivu o escaeciera'l treslláu..., ¡qué sé yo!, cualquier cosa. Pero, pasaos los díes, vese que nun ye asina. Nun solo paez que nun s'entregaren 20.000 pieces de La Campa y que se dexaren tiraes de cualquier manera, sinón que da la impresión de que pieces importantes pasaren a poder d'un particular o de particulares, y, pa peor, en Cataluña.
Destrozu talu nel patrimoniu arqueolóxicu y nel patrimoniu asturianu ye difícil de concebir. Esa irresponsabilidá pa colos restos beneficiaos de les escavaciones retrotraenos a enantes de los tiempos en que Xovellanos encargó a Reguera qu'escavare en Torres. Pero d'esa irresponsabilidá y daños nun son únicamente responsables les persones encargaes de la escavación, sonlo, pola so incuria y dexadez les autoridaes polítiques: Ayuntamientu de Xixón, Gobiernu Asturianu y otros.
¿Fará falta decir que tou ello tien munchu que ver col despreciu del PSOE pa tolo asturiano, col so antiasturianismu, que ye la cañamina constitutiva del so ser?
¿Fará falta señalar la relación ente los sucesos de La Campa, Grandas de Salime y el PSOE?
1 comentario:
Tengo les mesmes sensaciones. Sorprendióme l’afayu de les pieces amontonaes nun sótanu, pero conociendo’l ciñu que-y tien al patrimoniu asturianu esta alministración yera esperable alcontrar dalgún muertu d’esta mena. Lo que me dexó ablucáu dafechu foi’l restu: que too dios (Universidá, Ayuntamientu y gobiernu’l Principáu) supiera de la desaparición y naide denunciara’l casu; que l’afayu fuera hai un añu y fixérase público agora; les declaraciones del responsble (sic) de les escavaciones diciendo qu’eso fuera hai muncho tiempu y que nun yera responsabilidá suya; el fechu que parte del productu de les escavaciones (¿miles d’oxetos?) ten depositaos en domicilios particulares (que ten en Cataluña o nel Muséu Británicu ye lo de menos, el casu ye que nun hai costancia de lo que hai, podemos tar ente un casu de tráficu d’antigüedaes); pa rematar, al responsable (sic) d’esti absurdu, la conseyería de Cultura da-y un puestín bien remuneráu…
Cola llei na mano el señor Cuesta tien una responsabilidá clara nesti sucesu pero, en cualquier país civilizáu, diba haber unes responsabilidaes polítiques que deberíen costar el cargu a más d’ún nel Ayuntamientu de Xixón y na Conseyería de Cultura, pola propia desaparición de material arqueolóxicu, pola ocultación del casu y por nun pedir resposabilidaes al direutor de la escavación.
Publicar un comentario