Llanto equí dos semeyes de la mesma escena d'un capitel de Villanueva (el Diccionario geográfico de Asturias, de La Nueva España recueye n'Asturies 33 Villanueves, de les que 3 son "Vilanovas"), de San Pedro de Villanueva, en Cangues, guei Parador Nacional.
La figuración allúgase na portada de la ilesia, a la manzorga, y ye mui llamativa pol calter secular de la mesma, lloñe de les figuraciones de monstruos, d'animales o d'otres más comunes. Conozse como "La despedida del caballero" y nella puede vese ún como castiellu de fondu, y un "caballeru" que dende'l caballu y tornándo p'atrás, besa a la moza o dama.
Ñidiamente, les figures tán claramente desproporcionaes (¡menuda bigardona o samayona había ser ella pa tener esa altura!), a fin de sorrayar los aspectos figurativos y espresivos fundamentales, ente los que destaca'l besu na boca (que nos colexos eclesiásticos de los años 40, 50 y 60 hubiérese atapao, por ciertu), indicativu d'una pasión nada romántica y, dende llueu, muncho menos, d' "amor cortés".
Nun pretendia esti guañu ser una suxerencia pa los díes que queden de la Selmana Santa, pero puede selo: aprovechalos pa conocer meyor la nuestra tierra y país.
P.S. Tampoco ta nada mal la suxerencia de movimientu del caballu (o'l momentu de "a puntu empobinar"), cola pata de la manzorga llevantada. (O quiciabis, a cencielles, la inquietú del caballu, tal vez pensando: "Bueno, manín, ¿pa cuándo lo dexes? ¡Non, si entovía nun vamos ser p'arrancar güei".)
No hay comentarios:
Publicar un comentario